करमाळा / प्रतिनिधी
मुख्यमंत्री एकनाथ शिंदे सहृदय असलेला तळागाळातून वर गेलेला नेता असून सर्वसामान्यांची कळवळा असलेले एकनाथ शिंदे यांच्या कार्यकाळात एकही रुग्ण उपचाराविना राहणार नाही, मुख्यमंत्री वैद्यकीय सहाय्यता कक्षाचे प्रमुख मंगेश चिवटे मुख्यमंत्री एकनाथ शिंदे यांनी टाकलेला विश्वास सार्थ करून महाराष्ट्रातील रुग्णांना मदत देण्यासाठी रुग्णसेवक म्हणून कायमस्वरूपी काम करतील असा आशावाद माजी मंत्री बच्चू कडू यांनी व्यक्त केला.
यावेळी बोलताना बच्चू कडू पुढे म्हणाले की, मंगेशचिवटे यांना मिळालेली संधी ही राज्यातील गोरगरिबांची आरोग्य सेवा करण्यासाठी मिळालेली संधी आहे. शिवसेना वैद्यकीय मदत पक्षाच्या माध्यमातून त्यांनी संपूर्ण महाराष्ट्रात वैद्यकीय सेवा देणारी रुग्णसेवकांची टीम उभा केली असून या माध्यमातून अडचणीत असलेल्या रुग्णाला मदतीचा हात देणारी यंत्रणा उभी राहिली आहे. यावेळी माजी आ नारायण पाटील, रश्मी बागल कोलते, नागेश अक्कलकोटे यांची भाषणे झाली.
सत्काराला उत्तर देताना मंगेश चिवटे म्हणाले की, आज करमाळा शहरात ब्लड बँकेचे लोकार्पण झाले असून येणाऱ्या काळात लवकरच करमाळा डायलिसिस सेंटर उभा करून सेवा करणार आहे. स्वातंत्र्यसैनिक मनोहर गणपत चिवटे या नावाने मल्टीस्पेशालिटी हॉस्पिटल उभा करून सर्वसामान्यांना अल्प दरात रुग्ण सेवा देण्याचं माझं स्वप्न मी आपल्या सर्वांच्या सहकार्याने लवकर पुरे करेन असा आशावाद व्यक्त केला.
मुख्यमंत्र्याचे ओएसडी म्हणून नेमणूक झाल्याबद्दल मंगेश चिवटे यांचा आज करमाळ्यात नागरी सत्कार करण्यात आला. या वेळी , जेष्ठ पत्रकार राजा माने, शिवसेना सोलापूर संपर्कप्रमुख प्रा. शिवाजीराव सावंत, माजी आ नारायण पाटील, रश्मी दिदि बागल कोलते, बार्शी न.पा. विरोधी पक्षनेते नागेश अक्कलकोटे, सोलापूर जिल्हा शिवसेना प्रमुख शिंदे गट महेश चिवटे सोलापूर जिल्ह्यातील राजकीय, सामाजिक, सांस्कृतिक, क्षेत्रातील नागरिक मोठ्या संख्येने उपस्थित होते.
