अनगोळमध्ये दुर्गामाता देवी आगमन सोहळा उत्साहात

बेळगाव : बाबले गल्ली, अनगोळ येथील श्री जयशिवराय नवरात्र उत्सव मंडळ, गुरुदत्त सेवा संघ यांच्यावतीने श्री दुर्गामाता देवीचा आगमन सोहळा रविवारी सायंकाळी मोठ्या उत्साहात पार पडला. ‘दुर्गामाता की जय’ ‘अंबे माता की जय’च्या निनादात नवरात्र उत्सवानिमित्त बाबले गल्ली येथे श्री दुर्गामाता देवीची स्थापना करण्यात येत आहे. अनगोळ नाका येथून आण्णासाहेब गुंडप्पणावर, माजी नगरसेवक मोहन भांदुर्गे, विनायक गुंजटकर, राजू पवार, संजय पाटील, लक्ष्मण देमजी, बाबुराव हलगेकर, दीपक मुतगेकर, बाळू रेडेकर यांच्या हस्ते पूजन करून मिरवणुकीला सुरुवात झाली. यावेळी मिरवणुकीत माउली ढोलताशा व ध्वजपथक यांचे सुरेल वादन झाले. बाबले गल्लीतील नागरिकांनी देवीचे स्वागत केले. यावेळी चित्ररथावर देवीच्या रथाची आकर्षक सजावट केली होती. सदर उत्सवकाळात मंडळाच्यावतीने नऊ दिवस विविध कार्यक्रमांचे आयोजन करण्यात आले. यावेळी मंडळाचे कार्यकर्ते महिला मोठ्या संख्येने उपस्थित होते.