म. ए. समितीमुळे रुग्णाला मिळाला वैद्यकीय साहाय्यता निधी

बेळगाव : महाराष्ट्राचे मुख्यमंत्री एकनाथ शिंदे यांच्या मुख्यमंत्री वैद्यकीय साहाय्यता निधीमुळे बेळगावमधील एका महिलेवर यशस्वी हृदय शस्त्रक्रिया करणे शक्य झाले. महाराष्ट्रसोबतच बेळगावमधील नागरिकांनाही आता मुख्यमंत्री वैद्यकीय साहाय्यता निधीची मदत मिळत असल्याने नागरिकांमधून समाधान व्यक्त होत आहे. हलशीवाडी (ता. खानापूर) येथील रंजना रवींद्र देसाई (वय 59) यांची ओपन हार्ट सर्जरी करणे गरजेचे होते. त्यासाठी त्यांना 4 लाख रुपयांचा खर्च अपेक्षित होता. घरची परिस्थिती बेताचीच असल्याने त्यांनी महाराष्ट्र एकीकरण समितीच्या पदाधिकाऱ्यांशी संपर्क साधला. माजी महापौर मालोजी अष्टेकर यांनी महाराष्ट्र सरकारला शिफारस पत्र पाठवून वैद्यकीय साहाय्यता निधीची मागणी केली होती. वैद्यकीय मदत कक्षाचे प्रमुख मंगेश चिवटे यांच्या प्रयत्नातून रंजना देसाई यांच्या शस्त्रक्रियेसाठी एक लाख रुपयांची आर्थिक मदत देण्यात आली. ही मदत मिळाल्यामुळे त्यांच्यावर बेळगावच्या हॉस्पिटलचे डॉ. एम. डी. दीक्षित यांनी यशस्वी शस्त्रक्रिया केली. मुंबई येथे झालेल्या तज्ञ समितीच्या बैठकीमध्ये म. ए समितीचे नेते रमाकांत कोंडुसकर यांनी बेळगावमध्ये वैद्यकीय मदत मिळण्याबाबत मुख्यमंत्र्यांकडे मागणी केली होती. त्यानंतर महाराष्ट्र सरकारने जीआर पास करून बेळगावमधील नागरिकांना वैद्यकीय मदत मिळण्यासाठी प्रयत्न सुरू केले.