ऑनलाईन टीम / तरुण भारत :
प्रसिद्ध मराठी लेखक, नाटककार आणि दिग्दर्शक प्राजक्त देशमुख याच्या गाडीला मुंबई-नाशिक महामार्गावर अपघात झाला आहे. सुदैवाने या अपघातातून तो थोडक्यात बचावला.
प्राजक्तने यासंदर्भात एक ट्विट केले आहे. त्यामध्ये त्याने म्हटले आहे की, “मुंबई-नाशिक महामार्गावरून अवजड वाहने बेशिस्तीने चालतात. भिवंडी फाटय़ा अलिकडे एका ट्रकने सिमेंटचा डिव्हायडर ब्लॉक उडवला आणि तो माझ्या गाडीवर आदळला. थोडक्यात बचावलो. मी सुखरुप आहे. परंतु, या महामार्गाला कोणी वाली आहे का? की केवळ स्पीडगन लावून दंडाच्या पावत्या ठोकणे इतकंच त्यांचं काम? तसेच, अवजड वाहन हायवेला डावीकडून चालणं अपेक्षित असताना अत्यंत बेजबाबदारपणे हे घडलं. शिवाय ट्रकवाला न थांबता पळून गेला. नशीब बलवत्तर म्हणून वाचलो. मुंबई-नाशिक महामार्गावर जीव मुठीत धरुन गाडय़ा चालवा. जपा.”
