रत्नागिरी :
शहरानजीकच्या पानवल येथील डॉ. सीमा मेढे कांबळे यांनी थायलंडमधील महिदोल विद्यापीठाच्या आसियान इन्स्टिट्यूट फॉर हेल्थ डेव्हलपमेंट या आंतरराष्ट्रीय विद्यापीठामध्ये व्याख्याता म्हणून नियुक्ती मिळवली आहे. हे विद्यापीठ आरोग्य विकास, सार्वजनिक आरोग्य, आणि संबंधित क्षेत्रांमध्ये ‘संशोधन आणि शिक्षणासाठी जागतिक स्तरावर प्रसिद्ध आहे.
डॉ. सीमा यांनी वसंतराव नाईक मराठवाडा कृषी विद्यापीठ, परभणी येथून गृहविज्ञान विषयात पदवी आणि पदव्युत्तर शिक्षण पूर्ण केले आहे. त्यानंतर त्यांनी थायलंडमधील एशियन इन्स्टिट्यूट ऑफ टेक्नॉलॉ जी, थायलंड येथून अन्न विज्ञान आणि तंत्रज्ञान या विषयात उच्च शिक्षण, पीएचडी संपादन केली. डॉ. सीमा यांचे आंतरराष्ट्रीय दर्जाच्या नियतकालिक/जर्नल्समध्ये अनेक शोधनिबंध प्रकाशित झाले आहेत. तसेच त्यांनी राष्ट्रीय आणि आंतरराष्ट्रीय परिषदेमध्ये भाग घेऊन शोधनिबंध सादर केलेत.
डॉ. सीमा या थायलंड येथील आंतरराष्ट्रीय दर्जा असलेल्या चुलालोन्गकोर्न युनिव्हर्सिटी, थायलंड येथे पोस्ट डॉक्टरेट फेलो म्हणून कार्यरत होत्या. या कालावधीत . त्यांनी डॉ. बाळासाहेब सावंत कोकण कृषी विद्यापीठातंर्गत मत्स्य महाविद्यालय, शिरगाव-रत्नागिरी येथील तीन विद्यार्थी आणि कृषी महाविद्यालय, दापोली येथील एका विद्यार्थ्याला थायलंड येथील चुलालोन्गकोर्न युनिव्हर्सिटीमध्ये एमएसस्सी या पदव्युत्तर पदवीसाठी फेलोशिप आणि प्रवेश मिळण्यासाठी मार्गदर्शन केले.
