पुणे / प्रतिनिधी :
पाकिस्तानच्या गुप्तचर विभागाला माहिती पुरविल्याच्या प्रकरणात ‘डीआरडीओ’चे संचालक, वरिष्ठ शास्त्रज्ञ डॉ. प्रदीप कुरुलकर यांना 29 मेपर्यंत न्यायालयीन कोठडीत ठेवण्याचे आदेश विशेष न्यायाधीश पी. पी. जाधव यांनी मंगळवारी दिले. त्यानुसार कुरुलकर यांची येरवडा कारागृहात रवानगी करण्यात आली आहे. कुरुलकर यांना न्यायालयीन कोठडीत कारागृहातील विशेष कक्षात ठेवण्यात येणार आहे. त्यांना मधुमेह असल्याने कारागृहात औषधे उपलब्ध करून देण्याचे आदेश न्यायालयाने दिले आहेत. मात्र, त्यांना घरचे जेवण देण्याची विनंती न्यायालयाने अमान्य केली आहे. दरम्यान, राज्य दहशतवादी विरोधी पथकाकडून (एटीएस) पॉलीग्राफ चाचणी केली जाण्याची शक्यता आहे. गरज भासल्यास सखोल तपासासाठी कुरुलकर यांची पॉलीग्राफ चाचणी करण्यात येईल, असे एटीएसकडून न्यायालयात दाखल करण्यात आलेल्या अहवालात नमूद करण्यात आले आहे.
कुरुलकर यांच्या पोलीस कोठडीची मुदत मंगळवारी संपली. त्यानंतर एटीएसच्या पथकाने त्यांना शिवाजीनगर न्यायालयात हजर केले. त्यावेळी सरकार पक्षाकडून गेल्या चौदा दिवसात झालेल्या तपासाचा अहवाल सादर करण्यात आला. कुरुलकर यांचे वकील ऍड. ऋषीकेश गानू यांनी यापुढे पोलीस कोठडीची आवश्यकता नसल्याची विनंती न्यायालयाकडे केली. त्यानंतर विशेष न्यायाधीश पी.पी. जाधव यांनी कुरुलकर यांना 29 मेपर्यंत न्यायालयीन कोठडीत ठेवण्याचा आदेश दिला. त्यानुसार त्यांची येरवडा कारागृहात रवानगी करण्यात आली आहे. कारागृहात घरचे जेवण मिळावे, अशी विनंती करण्यात आली होती. न्यायालयाने कुरुलकर यांची विनंती अमान्य केली.
कुरुलकर यांना मधुमेह आहे. त्यांना वैद्यकीय तज्ञांच्या सल्ल्यानुसार नियमित औषधे घ्यावी लागतात. कारागृहात त्यांना औषधे उपलब्ध करुन द्यावीत, अशी विनंती ऍड. गानू यांनी न्यायालयाकडे केली. न्यायालयाने कुरुलकर यांना कारागृहात औषधे उपलब्ध करून देण्याचे आदेश दिले. सरकार पक्षाकडून सरकारी वकील ऍड. चंद्रकिरण साळवी यांनी बाजू मांडली.
कुरुलकर येरवडय़ातील विशेष कक्षात
कुरुलकर यांची येरवडा कारागृहात रवानगी करण्यात आल्यानंतर त्यांना कैद्यांच्या बराकीत ठेवले जाणार नाही. तर कारागृहातील विशेष कक्षात ठेवले जाणार आहे. पाकिस्तानी गुप्तचर यंत्रणेला गोपनीय माहिती पुरविल्याच्या आरोपावरुन कुरुलकर यांना 4 मे रोजी अटक करण्यात आली होती.
गरज भासल्यास कुरुलकरांची कारागृहात चौकशी
कुरुलकर यांच्याकडून जप्त करण्यात आलेल्या मोबाईल संचाचा न्यायवैद्यकीय अहवाल सोमवारी (15 मे) मिळाला. मोबाइल संच कुरुलकर यांच्यासमक्ष उघडण्यात आला. त्यामधील संवेदनशील माहितीचे सक्रिनशॉट काढण्यात आले आहेत. कुरुलकर यांनी पाकिस्तानी हेरांना गोपनीय माहिती पुरविल्याचा संशय आहे. गरज भासल्यास एटीएसचे अधिकारी कुरुलकर यांची कारागृहात जाऊन चौकशी करू शकतात, अशी माहिती सूत्रांनी दिली.
…तर कुटुंबीयांची संमती घेणार
पाकिस्तानी मोहजालात (हनीट्रॅप) अडकलेल्या डॉ. प्रदीप कुरुलकर यांची पॉलीग्राफ चाचणी करण्याबाबत एटीएसने विशेष न्यायालयात अहवाल सादर केला केला आहे. कुरुलकर यांची चौकशी करण्यात आली आहे. गरज भासल्यास कुरुलकर यांचे वकील ऍड. ऋषीकेश गानू तसेच त्यांच्या कुटुंबीयांना पॉलीग्राफ चाचणीबाबतची माहिती घेऊन त्यांची पॉलीग्राफ चाचणी करण्यात येईल. त्यासाठी कुरुलकर तसेच त्यांच्या कुटुंबीयांची संमती घेण्यात येईल, असे एटीएसकडून दाखल करण्यात आलेल्या अहवालात नमूद करण्यात आले आहे.
