डॉ . जयेंद्र परुळेकरांचा आरोप
सावंतवाडी । प्रतिनिधी
विद्यमान महायुती सरकारच्या काळात राज्यातील कंत्राटदारांचे ९० हजार कोटी आणि जिल्ह्यातील कंत्राटदारांचे ५०० कोटी रुपये थकीत असून या कंत्राटदारांवर आत्महत्या करण्याची पाळी आली असताना पर्यावरण उद्धवस्त करणारा ८६ हजार कोटी रुपयांचा शक्तीपीठ महामार्ग हवा कशाला ? चष्मा ,सेटटॉप बॉक्स कारखाना , मल्टीस्पेशालिटी हाॅस्पिटल प्रमाणेच आता शक्तीपीठ महामार्गा संबंधी अजून एक गाजर दाखवून जनतेची दिशाभूल करण्याचे काम सावंतवाडी विधानसभा मतदारसंघाचे विद्यमान आमदार दीपक केसरकर करीत आहेत असा आरोप उद्धव बाळासाहेब ठाकरे शिवसेनेचे जिल्हा प्रवक्ते डॉ. जयेंद्र परुळेकर यांनी केला आहे. परुळेकर म्हणाले , सिंधुदुर्ग जिल्ह्यातील शक्तीपीठ महामार्गाचा मार्ग बदलून आंबोली वरून मळगाव किंवा झिरो पाॅईंट येथे आणि तेथून तिलारी आणि रेडी जेटी पर्यंत नेण्याची विनंती सरकार दरबारी कशी केली हे केसरकर सांगत आहेत. या सर्व भुलथापा असून आमदार केसरकरांच्या वक्तव्यावर आता जनतेचा अजिबात विश्वास राहिलेला नाही असे टीकास्त्र परुळेकर यांनी सोडले .नागपूर ते रत्नागिरी महामार्ग असताना अजून एक महामार्ग विदर्भ -कोकणाला जोडण्याचा हा कोणाचा द्रविडी प्राणायाम आहे? शक्तीपीठ महामार्ग जनतेसाठी, पर्यटनासाठी आहे की सत्ताधारी राज्यकर्त्यांचे उखळ पांढरे करण्यासाठी आहे असा सवालही परुळेकर यांनी विचारला आहे . भविष्यात सावंतवाडी हा महाराष्ट्रातील असा एकमेव तालुका असेल ज्या तालुक्यातून एक दोन नव्हे तर तब्बल सहा महामार्ग जातील.सतरा वर्षे पुर्णत्वाच्या प्रतिक्षेत असलेला मुंबई -गोवा महामार्ग, प्रस्तावित शक्तीपीठ महामार्ग, सागरी महामार्ग, संकेश्वर बांदा महामार्ग, पनवेल – बांदा महामार्ग आणि प्रस्तावित सह्याद्री महामार्ग एवढे महामार्ग एकाच तालुक्यातून आखून सगळ्या जनतेला सरसकट येथून दुसरीकडे स्थलांतरित करण्याचाच घाट घातला जातोय काय? असा प्रश्न परुळेकर यांनी विचारलाय . जनतेच्या खऱ्या समस्या वेगळ्याच असून त्याकडे संपूर्ण दुर्लक्ष केले जात असून सतत खंडित होणारा वीजपुरवठा,युवा वर्गात वाढत चाललेली ड्रग्सची व्यसनाधीनता, आरोग्य व्यवस्थेचे वाजलेले तीन तेरा, परप्रांतीय घशात घालत चाललेल्या मोठमोठ्या जमिनी असे अनेक गंभीर प्रश्न असताना विद्यमान आमदारांचे तिथे अजिबात लक्ष नसून त्यांचे मतदारसंघाकडेच लक्ष नाहीये अशी घणाघाती टीका परुळेकर यांनी आमदार केसरकरांवर केली आहे.
