लोककल्प फाऊंडेशनतर्फे बदलापूर येथील दिव्यांग प्राण्यांच्या अनाथाश्रमाला देणगी

बेळगाव : लोकमान्य सोसायटी संचालित लोककल्प फाऊंडेशनतर्फे बदलापूर येथील दिव्यांग प्राण्यांच्या ‘पाणवठा’ या अनाथाश्रमाला 1 लाख 11 हजार रुपयांचा धनादेश देणगी स्वरुपात देण्यात आला. हा आश्रम डॉ. अर्चना व गणराज जैन पंधरा वर्षांपासून चालवत असून अनेक समस्यांना तोंड देत आश्रमाचे काम करत आहेत. आश्रमापर्यंत जाण्यासाठी पक्का रस्ता नाही. अधिकृत वीजपुरवठा नाही. शंभरपेक्षा अधिक अपंग प्राण्यांसाठी काम करणे अवघड होत आहे. दरवर्षी येणाऱ्या पुरामुळे यातील काही समस्या तरी कायमस्वरुपी मार्गी लागाव्यात, यासाठी लोकमान्य मल्टीपर्पज को-ऑप. सोसायटीने मदत करण्याचे ठरविले होते. त्यानुसार 1 लाख 11 हजार रुपयांचा धनादेश देणगी स्वरुपात प्रदान करण्यात आला. याप्रसंगी सोसायटीचे मुंबई विभागीय कार्यालयातील अधिकारी उपस्थित होते. स्वातंत्र्यवीर वि. दा. सावरकर यांच्या विचारानुसार आपण या देशाचे आणि समाजाचे देणे लागतो. मग ते आपण दानाच्या रुपातही करू शकतो. याचेच भान राखून लोकमान्य सोसायटीने समाजाचा विकास आणि प्रगतीसाठी सामाजिक व शैक्षणिक क्षेत्रात अनेक लोकांपर्यंत पोहोचून नवनवीन योजना आखून त्या कार्यान्वित करत समाजाला योगदान दिले आहे. अनेक दुर्गम खेडी दत्तक घेऊन तेथे वैद्यकीय सेवा पुरविणे, गरजू मुलांच्या शिक्षणाचा खर्च उचलणे, त्यांना शालेय साहित्य देणे असे उपक्रम सोसायटी नेहमीच करत आली आहे. याचाच एक भाग म्हणून ‘पाणवठा’ संस्थेला आर्थिक साहाय्य करण्यात आले.