मच्छी विक्रेत्यांना लॉटरी पद्धतीतून जागा ठरवून देणार ; नगराध्यक्ष चेतन चव्हाण
दोडामार्ग – वार्ताहर
गेल्या कित्येक महिन्यांपासून प्रतीक्षेत असलेल्या दोडामार्गचे मच्छी मार्केट उद्या २१ फेब्रुवारीपासून खुले करण्यात येत आहे. उद्यापासून या मच्छी मार्केट मधून मच्छी विक्री ला सुरुवात होणार असून आज गुरुवारी सायंकाळी सर्व मच्छी विक्रेत्यांना लॉटरीच्या माध्यमातून जागा ठरवून देण्यात येणार आहे. येथील बाजारपेठ परिसरातील एकूण वीस गुंठे क्षेत्र असलेल्या सर्वे क्रमांक २६५ मध्ये कसई -दोडामार्ग नगरपंचायतने हे मच्छी मार्केट उभारले आहे. जिल्हास्तर नगरोत्थान अभियान अंतर्गत या मच्छी मार्केट साठी रु. ४१ लाख ८९ हजार २७२ एवढा निधी देण्यात आला आहे. तर मच्छी मार्केट नजीक विविध वैशिष्ट्यपूर्ण योजनेअंतर्गत १४ लाख, ४७ हजार ९७७ रुपये खर्चून विशेष विहीर देखील बांधण्यात आली आहे. आज गुरुवारी सायंकाळी ४ वाजता यात मच्छी मार्केटमध्ये मच्छी विक्रेत्यांसाठी जागा ठरवून देण्यात येणार आहे. ही जागा लॉटरी पद्धतीने देण्यात येणार असल्याचे नगराध्यक्ष चेतन चव्हाण यांनी सांगितले आहे.
