पुणे / वार्ताहर :
दिव्यांग प्रमाणपत्र देण्यासाठी ससून रुग्णालयातील डॉ. पवन भिला शिरसाठ (वय 43) यांना 60 हजार रुपयांची लाच घेताना लाच लुचपत प्रतिबंध विभागाच्या (एसीबी) पथकाने बेडय़ा ठोकल्या. ससून रुग्णालयातील फिजिओथेरपी विभागात ही कारवाई करण्यात आली.
याप्रकरणी शिरसाठ याच्या विरोधात बंडगार्डन पोलीस ठाण्यात गुन्हा दाखल करण्यात आला आहे. याबाबत 55 वषीय व्यक्तीने तक्रार दिली आहे. डॉ. शिरसाठ हा ससून रूग्णालयातील अस्थिव्यंग उपचार शास्त्र विभागात भौतिक उपचार तज्ञ म्हणून नेमणुकीस आहे. तर तक्रारदार यांना दिव्यांग प्रमाणपत्र हवे होते. त्यांनी याबाबत ससून रूग्णालयाकडे अर्ज केला होता. डॉ. शिरसाठ याने तक्रारदारांना प्रमाणपत्र मिळवून देण्यासाठी वरिष्ठांना पैसे द्यावे लागतील, असे सांगून सुरवातीला 60 हजार रूपये व नंतर 50 हजारांच्या लाचेची मागणी केली. याबाबत तक्रारदाराने 3 एप्रिलला एसीबीकडे तक्रार दिली. तक्रारीची पडताळणी केल्यानंतर शिरसाठ याने लाच मागितल्याचे निष्पन्न झाले. त्यानुसार गुरूवारी दुपारी ससून रुग्णालयातच पथकाने सापळा रचून शिरसाठ याला 60 हजारांची लाच घेताना रंगेहाथ पकडले. दरम्यान, ससून रुग्णालयात लाचखोरीचा प्रकार समोर आल्याने एकच खळबळ उडाली आहे.
अधिक वाचा : पुण्यातील पोटनिवडणुकीसाठी भाजपकडून उमेदवारांची चाचपणी
एसीबीचे पोलीस अधीक्षक अमोल तांबे, अपर पोलीस अधीक्षक सुरज गुरव, पोलीस उपअधीक्षक श्रीहरी पाटील यांच्या मार्गदर्शनाखाली पोलीस निरीक्षक प्रणेता सांगोलकर यांच्या पथकाने ही कारवाई केली.
