पुणे / प्रतिनिधी :
पुणे जिल्ह्यातील दौंड तालुक्यात एका डॉक्टरने आपल्या पत्नी आणि दोन मुलांचा खून करुन स्वत: आत्महत्या केली असल्याची खळबळजनक घटना घडली. डॉक्टरने पत्नीचा खून करुन दोन लहान मुलांना विहिरीत टाकून आपले आयुष्य संपवले. डॉ.अतुल शिवाजी दिवेकर (वय-42) आणि पत्नी पल्लवी दिवेकर (वय-35) यांचे मृतदेह लटकलेल्या अवस्थेत घरात सापडले तर मुलगा अद्वित अतुल दिवेकर (वय-11) आणि मुलगी वेदांतिका अतुल दिवेकर (वय-7) यांचे मृतदेह विहिरीत आढळले आहेत.
सदरची घटना वरवंड येथील गंगासगर पार्कमध्ये रुम नंबर 201 मध्ये राहत्या घरी घडली आहे. या घटनेमुळे दौंड तालुक्यासह वरवंड परिसरात हळहळ व्यक्त होत आहे. पत्नीच्या त्रासाला कंटाळून हे पाऊल उचलले असल्याचे पोलिसांच्या प्राथमिक तपासात समोर आले आहे. डॉ. अतुल दिवेकर हे व्यवसायाने गुरांचे डॉक्टर असून त्यांची पत्नी एका शाळेत शिक्षिका असल्याची माहिती मिळाली आहे.
पोलिसांना घटनास्थळावरुन सुसाईड नोट मिळाली आहे. घराजवळ संबधित विहीर असून ती जवळपास 10 परस खोल असून 45 फूट एवढे पाणी असल्याने मुले वर काढण्यात मोठी अडचण येत आहे. अचानक घडलेल्या या घटनेमुळे गावावर शोककळा पसरली आहे. दौंड पोलीस याबाबत पुढील तपास पोलीस करीत आहेत.
