वृत्तसंस्था/ सिनसिनॅटी (अमेरिका)
एटीपी टूरवरील येथे सुरू असलेल्या सिनसिनॅटी मास्टर्स आंतरराष्ट्रीय टेनिस स्पर्धेत सर्बियाचा माजी टॉप सिडेड जोकोविच तसेच स्पेनचा विद्यमान टॉप सिडेड कार्लोस अल्कारेझ यांनी एकेरीची उपांत्यपूर्व फेरली गाठली आहे.
या स्पर्धेतील गुरुवारी झालेल्या सामन्यात जोकोविचने फ्रान्सच्या मोनफिल्सचा 6-3, 6-2 अशा सरळ सेट्समध्ये पराभव करत शेवटच्या आठ खेळाडूत स्थान मिळवले. जोकोविचचा पुढील फेरीतील सामना अमेरिकेच्या टेलर फ्रिझशी होणार आहे. सर्बियाच्या डिजेरीने दुखापतीमुळे आपला सामना अर्धवट सोडल्याने फ्रिझला पुढील फेरीत चाल मिळाली दुसऱ्या एका सामन्यात स्पेनच्या अल्कारेझने टॉमी पॉलचा 7-6,(8-6), 6-7 (0-7), 6-3 असा पराभव करत उपांत्यपूर्व फेरी गाठली आहे. गेल्या आठवड्यात झालेल्या टोरँटो स्पर्धेत टॉमी पॉलने अल्कारेझचा पराभव केला होता. अन्य एका सामन्यात मॅक्स प्युरसेलने उपांत्यपूर्व फेरीत प्रवेश मिळवताना स्वीसच्या वावरिंकाचा 6-4, 6-2 असा फडशा पाडला. त्याचप्रमाणे पॉपिरीनने रुसुव्होरीवर 6-2, 1-6, 6-3 अशी मात करत पहिल्यांदाच या स्पर्धेत शेवटच्या आठ खेळाडूत स्थान मिळवले. हुरकेझने सित्सिपसचा 6-3, 6-4, त्याचप्रमाणे जर्मनीच्या व्हेरेवने रशियाच्या मेदव्हेदेवचा 6-4, 5-7, 6-4 असा पराभव करत पुढील फेरीत स्थान मिळवले आहे.
