दिवाळी किल्ला स्पर्धेचे लोकमान्यतर्फे आयोजन

बेळगाव : लोकमान्य मल्टीपर्पज को- ऑप. सोसायटीच्यावतीने लोकमान्य दिवाळी किल्ला स्पर्धा 2023 चे आयोजन करण्यात आले आहे. सदर स्पर्धा बेळगाव महानगरपालिका हद्द मर्यादित आहे. संस्थेच्या स्थापनेपासून छत्रपती शिवाजी महाराजांचा इतिहास व गड-किल्ल्यांची माहिती व्हावी या उद्देशाने सदर स्पर्धेचे आयोजन करण्यात येते. या स्पर्धेला शहरातील तरुणांचा व बालचमूंचा भरभरून प्रतिसाद मिळतो व शिवमय वातावरण शहरात निर्माण होते.  सदर स्पर्धा बेळगाव-1, बेळगाव-2, शहापूर, वडगाव, अनगोळ, टिळकवाडी या विभागात घेण्यात येणार आहे. सदर किल्ला स्पर्धा भरविण्याकरिता संस्थेचे अध्यक्ष किरण ठाकुर, उपाध्यक्ष अजित गरगट्टी, संचालक गजानन धामणेकर, पंढरी परब, संचालक सुबोध गावडे यांचे मार्गदर्शन लाभत आहे. प्रत्येक विभागातील विजेत्यांना रोख बक्षिसे दिली जातील. स्पर्धेतील सर्वोत्कृष्ट किल्ल्यास गडांचा राजा हा किताब दिला जाईल.  स्पर्धेत भाग घेणाऱ्यांनी आपल्या प्रवेशिका खालील ठिकाणी लोकमान्य मल्टीपर्पज को-ऑप. सोसायटीच्या शाखांमध्ये द्याव्यात. कोनवाळ गल्ली शाखा (रोहन मेहंदळे), शहापूर शाखा (बसवराज बिरादर), वडगाव शाखा (रेवती जोशी), अनगोळ शाखा (प्रसाद नाडगौडा), टिळकवाडी शाखा (ज्योती रेगे), क्लब रोड शाखा (ज्योती गंभीर). नावे नोंदविण्याची शेवटची तारीख 17 नोव्हेंबर 2023 पर्यंत आहे. बेळगाव महानगरपालिका हद्दीतील किल्लाप्रेमींनी त्वरित संपर्क साधावा, असे आवाहन आयोजकांतर्फे करण्यात आले आहे.