छोट्या पडद्यावरून स्वत:च्या अभिनयाच्या कारकीर्दीला सुरुवात करणारी अभिनेत्री दिव्यांका त्रिपाठी सध्या स्वत:च्या आगामी वेबसीरिजवरून चर्चेत आहे. या सीरिजचे नाव ‘द मॅजिक ऑफ शिरी’ आहे. या सीरिजचा टीझर प्रदर्शित करण्यात आला आहे. यात दिव्यांका ही एका जादूगाराच्या भूमिकेत दिसून येणार आहे.
जादूगाराच्या प्रामुख्याने पुरुषप्रधान पेशात स्वत:ची ओळख निर्माण करू पाहणाऱ्या महिलेची भूमिका ती साकारत आहे. एक आई आणि पत्नीच्या रुपातही तिला दाखविण्यात आले आहे. याचबरोबर जावेद जाफरी देखील एका जादूगाराच्या रुपात या ट्रेलरमध्ये दिसून येत आहेत. दिव्यांका आणि जावेद जाफरी यांच्या भूमिका या सीरिजमध्ये परस्परांना विरोध करणाऱ्या आहेत.
द मॅजिक ऑफ शिरीच्या टीझरमध्ये दिव्यांकाला जादूगारासोबत एका गृहिणीच्या स्वरुपात सादर करण्यात आले आहे. या सीरिजबद्दल मी अत्यंत उत्साही आहे. या सीरिजला कुटुंबातील सर्वजण एकत्रितपणे पाहू शकणार आहेत असे तिने म्हटले आहे. 2019 मध्ये ‘कोल्ड लस्सी और चिकन मसाला’सोबत ओटीटीवर पदार्पण केल्यावर ‘द मॅजिक ऑफ शिरी’ ही दिव्यांकाची दुसरी वेबसीरिज आहे. या सीरिजचा प्रीमियर 13 जुलैपासून जियो सिनेमावर होणार आहे.
