जिल्हा प्रशासनातर्फे शिवजयंती उत्साहात

बेळगाव : जिल्हा प्रशासन, जिल्हा पंचायत, कन्नड व सांस्कृतिक विभाग आणि महानगरपालिका यांच्या संयुक्त विद्यमाने शिवाजी उद्यान येथे शिवजयंती साजरी करण्यात आली. खासदार जगदीश शेट्टर यांच्या हस्ते छत्रपती शिवाजी महाराजांच्या मूर्तीचे पूजन करण्यात आले. शिवजयंतीच्या निमित्ताने शिवाजी उद्यान परिसराला फुलांची आकर्षक सजावट करण्यात आली आहे. खासदार जगदीश शेट्टर म्हणाले, छत्रपती शिवाजी महाराज म्हणजे देशाला स्फूर्ती देणारे व्यक्तिमत्त्व आहे. त्यांचे विचार आजही समाजाला दिशादर्शक ठरतात. त्यामुळे इतक्या वर्षांनंतरही त्यांची जयंती मोठ्या उत्साहात साजरी होते. याप्रसंगी जिल्हाधिकारी मोहम्मद रोशन, जि. पं. चे सीईओ राहुल शिंदे, महापौर सविता कांबळे, उपमहापौर आनंद चव्हाण, माजी आमदार अनिल बेनके, मनपा आयुक्त बी. शुभा, कन्नड व सांस्कृतिक खात्याच्या उपसंचालक विद्यावती बजंत्री व अन्य नागरिक आणि नेते उपस्थित होते.