कॅन्टोन्मेंट बोर्ड मराठी प्राथमिक शाळा कॅम्प येथून शुभारंभ
प्रतिनिधी/ बेळगाव
महाराष्ट्र एकीकरण युवा समितीच्या शैक्षणिक उपक्रमाचा शुभारंभ कॅन्टोन्मेंट बोर्ड मराठी प्राथमिक शाळा, कॅम्प येथून करण्यात आला. दरवषी मातृभाषेतून शिक्षण घेणाऱ्या विद्यार्थ्यांना प्रोत्साहन आणि त्यांच्या पालकांचे कौतुक करण्यासाठी म. ए. युवा समितीच्यावतीने इयत्ता पहिलीच्या विद्यार्थ्यांना शालेय साहित्याचे वितरण करण्यात येते. त्यानुसार शनिवारी कॅन्टोन्मेंट बोर्ड मराठी प्राथमिक शाळेत शैक्षणिक साहित्याचे वितरण करण्यात आले.
कार्यक्रमाची सुऊवात म. ए. युवा समिती अध्यक्ष अंकुश केसरकर आणि सूरज कुडूचकर यांच्या हस्ते सरस्वती प्रतिमा पूजनाने करण्यात आली. यावेळी अंकुश केसरकर म्हणाले, मातृभाषेतून शिक्षण ही काळाची गरज असून जास्तीत जास्त पालकांनी आपल्या मुलांना मराठी शाळेत पाठविले पाहिजे, जेणेकरून आपली भाषा आणि संस्कृतीचे जतन होईल. कॅन्टोन्मेंट शाळेची पटसंख्या 2016-17 साली 120 इतकी खालावली होती. पण येथील शिक्षकांनी विविध उपक्रम राबवून आज ही पटसंख्या जवळपास 350 च्या घरात पोहोचवली आहे. तेव्हा याचा आदर्श घेणे गरजेचे आहे.
सरचिटणीस श्रीकांत कदम यांनी युवा समितीच्या शैक्षणिक उपक्रमांची माहिती दिली. सलग आठ वर्षे हा उपक्रम सुरू असून यावषी 300 शाळांतील पाच हजार विद्यार्थ्यांना शैक्षणिक साहित्य देण्याचा निर्धार युवा समितीच्यावतीने करण्यात आला आहे, असे सांगितले. शाळेचे माजी विद्यार्थी आणि ज्येष्ठ विमा सल्लागार अनंत गवळी आणि इतर मान्यवरांच्या हस्ते शैक्षणिक साहित्याचे वितरण करण्यात आले.
यावेळी युवा समिती कार्याध्यक्ष केळवेकर, उपाध्यक्ष वासू सामजी, खजिनदार विनायक कावळे, पदाधिकारी सूरज कुडूचकर, आशिष कोचेरी, शाळेचे शिक्षक आदी उपस्थित होते. मुख्याध्यापक प्रशांत बिर्जे यांनी प्रास्ताविक करून सूत्रसंचालन केले.
