विद्यार्थ्यांच्या संख्येत घट : पास काढण्याकडे दुर्लक्ष केल्याने महसुलावरही परिणाम
बेळगाव : शैक्षणिक वर्षाबरोबर बसपास वितरण प्रक्रियेला प्रारंभ झाला असला तरी आतापर्यंत केवळ 714 बसपास विद्यार्थ्यांनी काढले आहेत. बसपास काढण्यात विद्यार्थी निरुत्साही असल्याचे दिसत आहे. त्यामुळे बसपास घेणाऱ्यांची संख्या नगण्य असल्याचे दिसत आहे. दरवर्षी बसपास प्रक्रियेला प्रारंभ झाला की पास मिळविण्यासाठी विद्यार्थ्यांची गर्दी व्हायची. मात्र यंदा बसपास काढण्याकडे विद्यार्थ्यांनीही दुर्लक्ष केले आहे. त्यामुळे ही प्रक्रिया संथगतीने सुरू असल्याचेही दिसते. बेळगाव विभागात साधारण 76 हजारांहून अधिक विद्यार्थी बसपास काढतात. मात्र, शक्ती योजनेमुळे ही संख्या कमी झाली आहे. विद्यार्थिनींचा मोफत प्रवास सुरू आहे. त्यामुळे केवळ विद्यार्थीच बसपास घेवू लागले आहेत. बसपास वितरण प्रक्रिया ऑनलाईन सुरू आहे. शिवाय वितरणाची सुविधा बेळगाव वन कार्यालयात उपलब्ध करण्यात आली आहे. त्यामुळे प्रक्रिया सुरळीत झाली असली तरी बसपास मिळविणाऱ्या विद्यार्थ्यांची संख्या मात्र कमालीची घटल्याचे दिसून येत आहे.
बसपास अर्ज स्वीकृतीची सुविधा तीनच ठिकाणी
शैक्षणिक वर्षाबरोबर परिवहन मंडळाकडून विद्यार्थ्यांना सवलतीच्या दरात बसपास उपलब्ध करून दिले जातात. मागील दोन वर्षांत बसपास वितरणाची प्रक्रिया पूर्णपणे बदलली आहे. बसपाससाठी सेवा सिंधू पोर्टलवर अर्ज करावा लागत आहे. त्यानंतर बसपास उपलब्ध होवू लागले आहेत. यंदा बसपास अर्ज स्वीकृतीची सुविधा बेळगाव वन, कर्नाटक वन आणि ग्राम वनमध्ये उपलब्ध करण्यात आली आहे. बसपास वितरणाची सुविधा गोवावेस, हनुमाननगर आणि अशोकनगर येथे बेळगाव वन कार्यालयात उपलब्ध करण्यात आली आहे.त्यामुळे विद्यार्थ्यांना बसपास मिळविण्यासाठी या तीन ठिकाणीच जावे लागत आहे.
मोफत प्रवासाचा परिणाम
एकूण बसपास काढणाऱ्या विद्यार्थ्यांची संख्या घटल्याने परिवहनच्या उत्पन्नावरही परिणाम होण्याची शक्यता आहे. परिवहनला बसपासच्या माध्यमातून मोठा महसूल उपलब्ध होत होता. मात्र विद्यार्थिनींचा मोफत प्रवास सुरू आहे. त्यामुळे केवळ विद्यार्थीच बसपास काढू लागले आहेत. परिणामी बसपासच्या माध्यमातून मिळणारे उत्पन्नही निम्याहून कमी झाले आहे.
