एसआरएसकडे धर्मवीर चषक

बेळगाव : सनसेट वॉरियर्स पिरनवाडी आयोजित धर्मवीर चषक – 2025 भव्य हाफ पीच क्रिकेट स्पर्धेत एसआरएस संघाने एस. डी. लायन्स संघाचा पराभव करुन धर्मवीर चषक पटकाविला. या स्पर्धेत एस. डी. लायन्स संघाला उपविजेतेपदावर समाधान मानावे लागले. एस. डी. लायन्स पिरनवाडी संघाने नाणेफेक जिंकून प्रथम गोलंदाजी करण्याचा निर्णय घेतला. अंतिम सामना हा 5 षटकांचा होता. प्रथम फलंदाजी करत असताना एसआरएस हिंदुस्थान, अनगोळ या संघाने 5 षटकामध्ये 2 गडी बाद 61 धावा जमविल्या. या धावांचा पाठलाग करताना एस. डी. लायन्स पिरनवाडी या संघाने 5 षटकात 5 गडी बाद 36 धावा जमविल्याने  एस. आर. एस. हिंदुस्थान  संघाने 25 धावाने विजय मिळवून चषकावर आपले नाव कोरले. सामनावीर म्हणून  एसआरएसचा उमेश कुऱ्याळकर, उत्कृष्ट फलंदाज दस्तगीर, उत्कृष्ट गोलंदाज एसआरएसचा शाहू तर मालिकावीर म्हणून अमर परमेकरची निवड करण्यात आली. प्रमुख पाहुणे म्हणून अक्षय कोलकार, सचिन गोरले, कृष्णा बिंदले, रायनगोळ, गणेश आपटेकर, राहुल धामणेकर, मनोहर बिंदले उपस्थित होते.