ऑनलाईन टीम / तरुण भारत :
निवडणूक शपथपत्रात गुन्ह्यांची माहिती लपवल्याच्या प्रकरणात उपमुख्यमंत्री देवेंद्र फडणवीस यांना दोषमुक्त करण्यात आले आहे. नागपूरच्या प्रथमश्रेणी न्याय दंडाधिकारी न्यायालयाने आज हा निर्णय दिला.
या प्रकरणात ऍड. सतीश उके यांनी याचिका दाखल केली होती. निवडणूक शपथपत्रात दोन्ही गुन्हे लपविल्याप्रकरणी फडणवीसांवर गुन्हा दाखल करण्याची मागणी त्यांनी केली होती. या प्रकरणाच्या सुनावणीदरम्यान, नजरचुकेने दोन गुन्हे शपथपत्रात नमूद करण्याचे राहून गेले. या गुन्ह्यांविषयी माहिती न देण्याचा कोणताही वाईट उद्देश नव्हता, असे फडणवीस यांनी न्यायालयात युक्तीवादादरम्यान सांगितले. दोन्ही पक्षांचा युक्तिवाद पूर्ण झाल्यानंतर न्यायालयाने यावरील निर्णय 5 सप्टेंबरपर्यंत रोखून ठेवला होता. त्यानंतर हा निर्णय 8 सप्टेंबरपर्यंत पुढे ढकल्यात आला. आज न्यायालयाने निकाल जाहीर केला.
देवेंद्र फडणवीस यांच्याविरोधातील दोन गुन्हे हे खासगी स्वरुपाचे होते. जे गुन्हे लपवले त्याचा निवडणुकीवर कोणताही परिणाम होणार नसल्याने फडणवीसांना दोषमुक्त करण्यात आल्याचे न्यायालयाने सांगितले. या सुनावणीसाठी देवेंद्र फडणवीस हे ऑनलाईन पद्धतीने न्यायालयीन कामकाजात सहभागी झाले होते. फडणवीसांच्यावतीने वरिष्ठ विधीज्ञ सुबोध धर्माधिकारी यांनी न्यायालयात बाजू मांडली.
