रामतीर्थनगरमध्ये राणी चन्नम्मांचा पुतळा उभारण्याची मागणी

बेळगाव : कित्तूर राणी चन्नम्मा यांचे शौर्यपूर्ण जीवन सर्वांसाठी प्रेरणादायी आहे. त्यामुळे जनतेने राणी चन्नम्मा यांचा आदर्श डोळ्यासमोर ठेवावा. यासाठी रामतीर्थनगर येथील जिल्हा क्रीडांगणानजीकच्या बसवेश्वर लेआऊटमध्ये कित्तूर राणी चन्नम्मा यांचा पुतळा उभारण्यात यावा, अशी मागणी रामतीर्थनगरमधील बसेवश्वर लेआऊट पंच देवालय विकास संघाच्यावतीने करण्यात आली. याबाबतचे निवेदन जिल्हाधिकाऱ्यांना देण्यात आले. राज्य सरकारकडून दरवर्षी कित्तूर उत्सव साजरा करण्यात येतो. काही दिवसांपूर्वी कित्तूर संग्रामचा 200 वा दिन साजरा करण्यात आला. या सर्व उत्सवांच्या माध्यमातून राणी चन्नम्मा यांना आदरांजली वाहिली जात आहे. ही बाब आनंददायी आहे. दरम्यान रामतीर्थनगर वेगाने विकसित होत आहे. यासाठी बसवेश्वर लेआऊटच्या 6 व्या क्रॉसवरील सर्कलमध्ये राणी चन्नम्मा यांचा पुतळा उभारण्यात यावा, अशी मागणी रामतीर्थनगर रहिवासी व व्यावसायिकांच्यावतीने करण्यात आली. यावेळी संतोष देसाई, विरपादय्या कळ्ळोळीमठ, बसवराज वरजन्नवर, डी. एस. अगसगी, उषा विजयकुमार, रश्मी कटपट्टी यांच्यासह रहिवासी उपस्थित होते.