यमनापूर मुख्य रस्त्यावरील खड्डा त्वरित बुजविण्याची मागणी

कंग्राळी बुद्रुक : कंग्राळी बुद्रक गावाकडून यमनापूर गावाकडे राजू पावशे यांच्या घराजवळून जाणाऱ्या मुख्य रस्त्यावर पडलेला मोठा खड्डा त्वरित बुजवून रस्ता वाहतुकीला सुरळीत करण्याची मागणी नागरिकांतून करण्यात येत आहे. महानगरपालिकेच्या वरिष्ठ अधिकाऱ्यांनी तसेच या भागाच्या नगरसेवकांनी त्वरित लक्ष देऊन खड्ड्याची दुरूस्ती करून वाहनधारकांना दिलासा देण्याची मागणी करण्यात येत आहे. कंग्राळी बुद्रुक गावाकडून यमनापूरकडे जाणारा हा मुख्य रस्ता राजू पावशे यांच्या घरापासून महानगरपालिका हद्दीतून पुढे जातो याच ठिकाणी ग्रा. पं. हद्द समाप्त होते. बरोबर याच ठिकाणी हा मोठा खड्डा पडलेला असून या खड्याला तळ्याचे स्वरूप प्राप्त झाले आहे. या खड्ड्यातून वाहनधारकांना वाहने चालवताना तारेवरची कसरत करावी लागत आहे. तसेच एखादे वाहन गेल्यास रस्त्यावरून जाणाऱ्या येणाऱ्यांच्या अंगावर खड्ड्यातील घाण पाणी उडून कपडे खराब होण्याच्याही घटना घडत आहे. तेव्हा संबंधितानी सदर खड्डा बुजवून रस्ता वाहतुकीला सुरळीत करण्याची मागणी होत आहे.