कोनेवाडी गावातील रस्ता पूर्ण करण्याची मागणी

उचगाव : कोनेवाडी येथील गल्लीतील रस्ता करण्यासाठी ठेकेदाराने रस्ता खणून त्यावर खडी पसरवून दोन महिने झाले. पण, अद्याप हा रस्ता पूर्ण केलेला नाही. रस्ता करण्याअगोदरच ठेकेदार गायब झाला आहे. परिणामी येथील ग्रामस्थांचे हाल होत आहेत. तातडीने ठेकेदाराने हा रस्ता पूर्ण करावा, अशी मागणी येथील नागरिकांनी केली आहे. कोणेवाडी गावच्या मागील बाजूने देवरवाडी, महिपाळगड या भागात जाण्यासाठी हा एक महत्त्वपूर्ण रस्ता आहे. सदर रस्ता पक्का करण्यासाठी खणण्यात आला आणि त्यावर खडी पसरवण्यात आली. खडी पसरवून झाल्यानंतर ठेकेदार गायब झाला आहे. या रस्त्यावरून दुचाकी वाहने चालवणे मुश्किल झाले असून, अनेक  वाहनचालक पडून जखमी झाल्याच्या अनेक घटना घडल्या आहेत. तरी तातडीने सदर ठेकेदाराने या रस्त्याचे काम पूर्ण करावे, अशी मागणी होत आहे.