मुख्यमंत्री रेखा गुप्ता उद्या अर्थसंकल्प सादर करणार
वृत्तसंस्था/ नवी दिल्ली
दिल्ली विधानसभेचे अर्थसंकल्पीय अधिवेशन 24 मार्चपासून सुरू होत आहे. हे अधिवेशन पाच दिवस म्हणजेच 28 मार्चपर्यंत चालेल. तथापि, गरज पडल्यास त्याचा कालावधी वाढवला जाणार आहे. दिल्लीच्या मुख्यमंत्री रेखा गुप्ता मंगळवार, 25 मार्च रोजी अर्थसंकल्प सादर करतील. हा दिवस वगळता सर्व दिवशी प्रश्नोत्तराचा तास आयोजित केला जाईल. या सत्रात, दिल्ली परिवहन महामंडळाशी संबंधित नियंत्रक आणि महालेखा परीक्षकांचा (कॅग) अहवाल सादर केला जाईल. अधिवेशनादरम्यान सभागृहाचे कामकाज दररोज सकाळी 11 वाजता सुरू होईल. अर्थसंकल्पीय अधिवेशनात दिल्ली सरकारच्या धोरणांवर आणि योजनांवर चर्चा होण्याची शक्यता आहे. विरोधकही विविध मुद्यांवर सरकारला घेरण्याची तयारी करत आहेत. या अर्थसंकल्पात दिल्लीतील लोकांसाठी अनेक महत्त्वाच्या घोषणा होऊ शकतात, विशेषत: वाहतूक, आरोग्य, शिक्षण आणि पायाभूत सुविधांच्या क्षेत्रात नवीन तरतुदी अपेक्षित आहेत.
