शिवाजी उद्यानात शिवप्रतिष्ठानतर्फे दीपोत्सव

बेळगाव : शिवप्रतिष्ठान हिंदुस्थानतर्फे प्रतिवर्षाप्रमाणे यावर्षीही छत्रपती शिवाजी उद्यानात दीपोत्सव साजरा करण्यात आला. ‘पहिला दिवा शिवाजी महाराजांसमोर’ हा उपक्रम मागील काही वर्षांपासून राबविला जात आहे. दिवाळीची सुरुवात छत्रपती शिवाजी महाराजांच्या पूजेने व्हावी, या उद्देशाने उपक्रम राबविला जात आहे. रविवारी झालेल्या दीपोत्सवाने शिवाजी उद्यान परिसर उजळून निघाला होता. त्याचबरोबर भजनाच्या मंगलमय सुरात दिवाळी पहाटची सुरुवात झाली. रविवारी पहाटे शिवप्रतिष्ठानचे धारकरी तसेच शिवभक्तांच्या उपस्थितीत दीपोत्सव कार्यक्रम पार पडला. कंग्राळी येथील हभप गोपाळ पाटील यांच्या मार्गदर्शनाखाली दीपोत्सव करण्यात आला. छत्रपती शिवाजी महाराजांच्या मूर्तीचे विधिवत पूजन करण्यात आले. शिवप्रतिष्ठानचे कर्नाटक प्रांतप्रमुख किरण गावडे यांच्या हस्ते शिवरायांच्या मूर्तीचे पूजन करण्यात आले. सध्याच्या युवा पिढीला दीपोत्सव तसेच आपले सण-उत्सव यांची माहिती समजावी, यासाठी दीपोत्सवाचा उपक्रम राबविण्यात येत असल्याचे किरण गावडे यांनी सांगितले. पहाटेच्या मंगलमय वातावरणात शिवाजी उद्यान परिसर दिव्यांच्या प्रकाशाने उजळून निघाला होता. अभ्यंगस्नान करून शिवभक्त छत्रपती शिवाजी महाराजांच्या मूर्तीचे दर्शन घेण्यासाठी शिवाजी उद्यान परिसरात दाखल झाले होते. यानिमित्त शिवरायांच्या मूर्तीला आकर्षक सजावट करण्यात आली होती. या कार्यक्रमाला जिल्हाप्रमुख विश्वनाथ पाटील, शहरप्रमुख अनंत चौगुले, तुकाराम पिसे यांच्यासह मोठ्या संख्येने शिवभक्त उपस्थित होते.