डेकोरेटिव्ह दिव्यांचा वापर आता जाहिरातबाजीसाठी

बेळगाव : स्मार्ट सिटी योजनेंतर्गत शहर व उपनगरात फूटपाथवर डेकोरेटिव्ह लाईट उभारले आहेत. यापैकी काही  बंद तर काही दिव्यांची दुरवस्था झाली आहे. क्लब रोडवरील दिव्यांचा वापर जाहिरातबाजीसाठी केल्याचे दिसून येत आहे. हे डेकोरेटिव्ह दिवे जाहिरातीसाठी की नागरिकांसाठी? असा मुद्दा उपस्थित होत आहे. शहर सुशोभिकरणासाठी स्मार्ट सिटी योजनेंतर्गत कोट्यावधी निधीअंतर्गत रस्त्यांचा विकास, फूटपाथ, डेकोरेटिव्ह दिवे, विविध सुविधा उपलब्ध केल्या आहेत. काही ठिकाणी सीसीटीव्ही कॅमेरे व अत्याधुनिक यंत्रणा बसविली आहे. मुख्य रस्त्यांच्या काँक्रिटीकरणानंतर दुतर्फा फूटपाथवर डेकोरेटिव्ह दिवे बसविण्यात आले. यासाठी कोट्यावधी निधी खर्ची घातला आहे. शहरवासियांना सुविधा आणि शहराचे सौंदर्य खुलविण्याच्या हेतूने  आकर्षक दिवे बसविले आहेत.  काही ठिकाणी या दिव्यांची दुरवस्था झाल्याने त्यांचा उपयोग जाहिराती बसविण्यासाठी केला जात आहे. पंतप्रधान नरेंद्र मोदी यांच्या रोड शो वेळी काँग्रेस रोडवरील दिव्यांचा वापर झेंडे लावण्यासाठी झाला होता. काही ठिकाणी जाहिराती लावल्या होत्या. काही ठिकाणांचे दिवे वर्षभरानंतर बंद पडले. त्यांच्या दुरुस्तीकडे महापालिकासह स्मार्ट सिटी कंपनीचे दुर्लक्ष झाले आहे. दिव्यांच्या देखभालीकडे कानाडोळा केला जातो. मात्र, दिव्यांचा वापर जाहिरात फलक लावण्यासाठी केला जात आहे. काँग्रेस नेते राहुल गांधी सोमवारी बेळगाव दौऱ्यावर येत आहेत. त्यांच्या स्वागतासाठी शहर-उपनगरात स्वागत फलक उभारले आहेत. क्लब रोड परिसरातील  डेकोरेटिव्ह दिवे जाहिरातीसाठी कमी पडू लागले आहेत. क्लब रोडशेजारील डेकोरेटिव्ह दिव्यांचा उपयोग चक्क जाहिरात फलकांसाठी केला आहे. हे दिवे नागरिकांच्या सेवेसाठी की जाहिरात फलक लावण्यासाठी? असा मुद्दा उपस्थित होत आहे.