हावभावाद्वारे आंदोलन, सरकारविरोधात संताप
बेळगाव : मूकबधिरांना सरकारी सेवेत सामावून घ्यावे, मोफत बसप्रवास द्यावा, सांकेतिक भाषा-लिपीतून शिक्षणाची व्यवस्था करावी, मासिक पेन्शनमध्ये वाढ करावी, कर्णबधीर कुटुंबासाठी कल्याणकारी अनुदान उपलब्ध करावे, त्याचबरोबर वृद्धाश्रमाची सुविधा उपलब्ध करावी, आदी मागण्यांसाठी राज्य मूकबधीर कल्याण संघटनेतर्फे मंगळवारी विधानसौध परिसरात आंदोलन छेडण्यात आले. यावेळी मूकबधीर आणि कर्णबधीर आंदोलनकर्त्यांनी विविध मागण्यांची पूर्तता करावी, यासाठी हावभावाद्वारे संताप व्यक्त केला. सरकारी नोकऱ्यांमध्ये मूकबधीर आणि कर्णबधीर युवकांना सामावून घेऊन प्रोत्साहन द्यावे, त्याचबरोबर शक्ती योजनेप्रमाणेच मूकबधीर आणि कर्णबधिरांना मोफत बससेवा द्यावी, अशी मागणीही करण्यात आली.
आर्थिक पाठबळ देण्यासाठी कर्णबधिरांची मासिक पेन्शन 1400 वरून 5000 रुपयांपर्यंत वाढ करून देण्यात यावी. राज्यात मूकबधीर विद्यार्थ्यांना शिक्षण देण्यासाठी सांकेतिक भाषा लिपीतून शिक्षण देण्याची व्यवस्था करावी, प्रभावीपणे संवाद साधण्यासाठी संबंधित शिक्षकांना प्रशिक्षण देण्यात यावे, क्रीडाक्षेत्रात प्रोत्साहन देण्यासाठी आणि जिल्हास्तरीय, राज्यस्तरीय व राष्ट्रीय स्तरावर क्रीडा स्पर्धांमध्ये भाग घेण्यासाठी क्रीडा अनुदान सुरू करण्यात यावे, तसेच कर्णबधीर कुटुंबीयांना सन्मानाने जगण्यासाठी कल्याणकारी अनुदान उपलब्ध करून द्यावे, मूकबधीर, कर्णबधिरांना उतारवयात संगोपन करण्यासाठी वृद्धाश्रमाची व्यवस्था करण्यात यावी, अशा मागण्या मूकबधीर आंदोलकांनी हावभावाद्वारे केल्या आहेत.
