काणका येथे 11 केव्ही विजेची दिवसा चोरी

म्हापसा : डिमेलवाडा काणका येथे भूमिगत वीज वाहिनी टाकण्याच्या कामासाठी लागणारी वीज कंत्राटदार व सुपरवायझरने थेट मुख्य हायटेन्शन तारेला साधी वायर जोडून घेतली होती. हा प्रकार प्रथम दै. तरुण भारतने उघडकीस आणल्यानंतर वीज खात्याच्या कर्मचाऱ्यांनी धाव घेऊन वायर्स काढण्यास लावली. यावेळी आमच्याकडे बोर्ड नसल्याने आम्ही थेट वीज घेतली असल्याची माहिती कंत्राटदार व सुपरवायझरने दिली. या भागात सलग तीन दिवस हे काम सुरू असून हा प्रकार गुरुवारपासून सुरू होता. मात्र तो शुक्रवारी उजेडात आला. विशेष म्हणजे 11 केव्ही वीजवाहिनीला घरगुती एलटी वायर्सचा वापर करून दिवसा ढवळ्या येथे विजेची चोरी केली जात होती. असे खुलेआम सरकारी कामासाठी विजेची चोरी करणाऱ्यांवर कारवाई कोण करणार, असे प्रश्न उपस्थित होत आहे. हे काम करीत असताना त्यांच्याकडे जनरेटर असणे आवश्यक आहे. मात्र येथे हा कंत्राटदार व सुपरवायझर थेट 11 केव्हीला एलटी वायर्स लावून वीज चोरी करताना सापडला आहे. याबाबत वृत्त सोशल मीडियावर वाऱ्यासारखे पसरताच त्याची दखल घेऊन वीज खात्याचे कर्मचारी त्या ठिकाणी धावून आले. त्यांनी सुपरवायझरला काम बंद करण्यास सांगून वायर्स काढण्यास लावली.