देवरुख :
सासरे घरातील कामे करावयास सांगतात याचा राग मनात धरून सुनेने जेवणामध्ये विषारी द्रव टाकून सासऱ्यांना जीवे मारण्याचा प्रयत्न केल्याची खळबळजनक घटना संगमेश्वर तालुक्यातील कोसुंब रेवाळेवाडी येथे घडली आहे. यात सासऱ्याबरोबरच पतीलादेखील विषबाधा झाली असून रत्नागिरी येथील शासकीय रुग्णालयात त्यांच्यावर उपचार सुरू आहेत. याप्रकरणी सुनेवर देवरुख पोलीस ठाण्यात गुन्हा दाखल करून तिला अटक करण्यात आले आहे.
देवरुख पोलीस ठाण्यातून मिळालेल्या माहितीनुसार, सचिन जगन्नाथ सोलकर (34) यांनी फिर्याद दिली आहे. स्वप्नाली सचिन सोलकर (32) असे संशयित आरोपी महिलेचे नाव आहे. सचिन सोलकर व स्वप्नाली सोलकर यांचा 13 एप्रिल 2025 रोजी विवाह झाला. स्वप्नाली हिला सासरे जगन्नाथ सोलकर हे घरातील कचरा काढणे, साफसफाई करणे व इतर कामे चांगल्या प्रकारे करण्यास सांगायचे. याचा राग स्वप्नाली हिने मनात धरून जगन्नाथ सोलकर यांना जीवे ठार मारण्यासाठी चक्क जेवणामध्ये विषारी द्रव मिसळल्याचे सचिन सोलकर याने फिर्यादीत नमूद केले आहे. विष मिसळलेले जेवण खाल्ल्याने सचिन यालादेखील विषबाधा झाली. ही घटना मंगळवारी 22 जुलै रोजी रात्री 9.30 वाजता घडली.
जगन्नाथ सोलकर व सचिन सोलकर यांना अचानक अस्वस्थ वाटू लागल्याने त्यांना प्रथम देवरुख ग्रामीण रुग्णालयात उपचारासाठी दाखल करण्यात आले. त्यानंतर अधिक उपचारासाठी जिल्हा शासकीय रुग्णालयात दाखल करण्यात आले. उपचारादरम्यान जगन्नाथ सोलकर व सचिन सोलकर यांना विषबाधा झाल्याचे स्पष्ट झाले. दोघांवर जिल्हा रुग्णालयात उपचार सुरू असून प्रकृतीत सुधारणा होत आहे. या घटनेची माहिती मिळताच उपविभागीय पोलीस अधिकारी नीलेश माईनकर यांनी घटनास्थळी भेट देत पाहणी व पंचनामा केला. याप्रसंगी देवरुख पेलीस निरीक्षक उदय झावरे, पोलीस हेड कॉन्स्टेबल प्रशांत मसुरकर, सचिन कामेरकर, सचिन पवार, सहाय्यक पोलीस फौजदार श्रीकांत जाधव, महिला पोलीस कॉन्स्टेबल मंजुश्री पाडावे आदी उपस्थित होते.
