वृत्तसंस्था/ पोर्ट ऑफ स्पेन
खराब टप्प्यातून जात असलेल्या वेस्ट इंडिज क्रिकेट संघाचे नशीब बदलण्यासाठी देशाच्या क्रिकेट बोर्डाने मोठा निर्णय घेतला आहे. संघाच्या ड्रेसिंग रूममध्ये पुन्हा एकदा दोन वेळा विश्वचषक विजेता कर्णधार डॅरेन सॅमी दिसणार आहे. यावेळी सॅमी बदललेल्या भूमिकेत असेल. क्रिकेट वेस्ट इंडीजने सॅमीची वनडे आणि टी-20 संघाचा मुख्य प्रशिक्षक म्हणून नियुक्ती केली आहे.
सॅमीचा संघासोबतचा पहिला कार्यक्रम संयुक्त अरब अमिराती विरुद्ध शारजाह येथे खेळली जाणारी तीन सामन्यांची एकदिवसीय मालिका असेल. क्रिकेट वेस्ट इंडिजने एक निवेदन जारी करून याबाबत माहिती दिली आहे. वनडे आणि टी-20 संघाची जबाबदारी सॅमीच्या हाती आली आहे, तर माजी यष्टिरक्षक- फलंदाज आंद्रे कोलची कसोटी संघाच्या प्रमुखपदी नियुक्ती करण्यात आली आहे. जुलैमध्ये भारताविरुद्धच्या दोन सामन्यांच्या कसोटी मालिकेपासून तो वेस्ट इंडिजसोबतचा प्रशिक्षक करार सुरू करेल. सॅमी आणि आंद्रे या दोघांना कोचिंगचा अनुभव आहे. सॅमीने पाकिस्तान सुपर लीगमध्ये प्रशिक्षकपद भूषवले आहे. याशिवाय त्याने कॅरेबियन प्रीमियर लीगमध्येही प्रशिक्षकपद भूषवले आहे. दुसरीकडे, जमैकाच्या आंद्रेने वेस्ट इंडिजमध्ये प्रत्येक स्तरावर प्रशिक्षक म्हणून काम केले आहे. याआधी तो संघाचा सहाय्यक प्रशिक्षक म्हणून झिम्बाब्वे आणि दक्षिण आफ्रिका दौऱ्यावर गेला होता.
