बोगमाळोत दरड कोसळून कार व शेडची हानी

वास्को : बोगमाळोतील एका चर्चमागील डोंगरावरील दरड कोसळून नुकसान होण्याची घटना मंगळवारी पहाटे घडली. एकामागोमाग चार भले मोठे दगड खाली आले. सुदैवाने या घटनेत कुणीही जखमी झाला नाही. बोगमाळोतील मुख्य रस्त्यावरील वळणाजवळ सेंट कॉस्मे अॅण्ड दामीआव चर्च असून या चर्चच्या शेजारीच इमारत आहे. या इमारतीमागील डोंगर कापलेल्या अवस्थेत असून याच डोंगराच्या कडेवरून मंगळवारी पहाटे दोनच्या सुमारास इमारतीच्या पायथ्याशी दरड कोसळली. एकामागोमाग चार भले मोठे दगड मातीसह खाली आले. इमारतीच्या शेडमध्ये काही वाहने पार्क केलेली होती. दरड त्या शेडवर कोसळल्याने शेडचे आणि शेडमधील कारचे नुकसान झाले. अग्नीशामक दलाने या घटनेची माहिती मिळताच घटनास्थळी दाखल होऊन मदतकार्य हाती घेतले. सदर इमारतीच्या मागील डोंगर कापलेल्या अवस्थेत असल्याने व त्या ठिकाणी कोणतीही सुरक्षा नसल्याने त्या डोंगरावरून आणखी दरड कोसळण्याची भिती व्यक्त करण्यात येत आहे. त्यामुळे या ठिकाणी जीवीत व वित्त हानी रोखण्यासाठी सुरक्षा उपाय योजना करण्याची आवश्यकता व्यक्त करण्यात येत आहे. स्थानिक सरपंच संकल्प महाले तसेच पंच अरूण नाईक यांनी घटनास्थळी येऊन पाहणी केली व मदत कार्य केले. मुरगाव मामलेदार कार्यालयाने या घटनेचा पंचनामा केला आहे. सदर डोंगराच्या पायथ्याशी संरक्षीत भिंत उभारून धोका दूर करण्याची आवश्यकता सरपंच संकल्प महाले यांनी व्यक्त केलेली असून त्यादृष्ठीने प्रयत्न करण्यात येतील असे त्यांनी स्पष्ट केले आहे.