पुणे / प्रतिनिधी :
दलित तरुणाने नोकरीबरोबरच उद्योग-व्यवसायात पुढे येऊन आपले स्थान बळकट केले पाहिजे. त्यासाठी शासन म्हणून आम्ही आपल्या पाठीशी खंबीरपणे उभे राहू. तसेच दलित इंडियन चेंबर ऑफ कॉमर्स ऍण्ड इंडस्ट्री (डिक्की) च्या माध्यमातून आपल्याला व्यवसाय कौशल्य व प्रशिक्षणासाठी योग्य ते सहकार्य करणार असल्याची ग्वाही पालकमंत्री चंद्रकांतदादा पाटील यांनी शुक्रवारी येथे दिली.
दलित इंडियन चेंबर ऑफ कॉमर्स ऍण्ड इंडस्ट्री (डिक्की) च्या संयोजनाने व पद्मश्री मिलिंद कांबळे यांच्या प्रयत्नातून देशभरात स्टार्टअप इंडियाच्या माध्यमातून दलित युवकांसाठी विविध योजना व उपक्रम राबविण्यात येत आहेत. त्याचाच एक घटक म्हणजे भारतरत्न डॉ. बाबासाहेब आंबेडकर यांच्या जयंतीच्या निमित्ताने दलित युवकांना डिझेल, पेट्रोल टँकरचे वितरण करण्यात आले. त्यावेळी ते बोलत होते. निवड झालेल्या दलित युवकांना पेट्रोल, डिझेल टँकरच्या चाव्या देण्यात आल्या. डिक्कीचे संस्थापक पद्मश्री मिलिंद कांबळे, महाराष्ट्र अध्यक्ष मुकुंद कमलाकर, भारतीय स्टेट बँकेचे आशुतोष कुमार, संतोष कांबळे, सातारा समन्वयक प्रसन्ना भिसे, महिला समन्वयक सीमा कांबळे, अविनाश जगताप यासह अनेक मान्यवर या वेळी उपस्थित होते.
पाटील म्हणाले, भारतरत्न डॉ.बाबसाहेब आंबेडकर यांच्या जयंतीनिमित्त राबविण्यात आलेला अतिशय उपयुक्त, रोजगाराभिमुख आणि माणसाचे जीवन समृद्ध करणारा हा उपक्रम आहे. वास्तविक हेच खरे आंबेडकरांना व त्यांच्या विचारांना अभिवादन आहे.
देशभरात तरुणांना योजनेचा लाभ
कांबळे म्हणाले, संपूर्ण भारतभर केंद्र सरकार व राज्य सरकार यांच्या सहकार्याने विविध योजना दलित समाजासाठी सुरू आहेत. त्याचाच एक भाग म्हणून आज टँकर वितरण केले जात आहे. या अंतर्गत 25 टक्के केंद्र सरकार व 15 टक्के राज्य सरकार यांच्याकडून अनुदान दिले जात आहे. देशभरात 3700 दलित तरुणांना या योजनेचा लाभ डिक्कीने करून दिला आहे.
