पुणे / प्रतिनिधी :
भारतीय लष्करातून निवृत्त झालेल्या एका सुभेदाराची सायबर चोरट्यांनी एक कोटी दहा लाख रुपयांची ऑनलाईन फसवणूक करण्यात आल्याचा प्रकार उघडकीस आला आहे. याबाबत पुणे सायबर पोलीस ठाण्यात अज्ञात चोरटट्यांच्या विरुद्ध गुन्हा दाखल करण्यात आला असल्याची माहिती पोलिसांनी शनिवारी येथे दिली.
याबाबत निवृत्त सुभेदाराने अनोळखी आरोपीविरोधात पोलिसांकडे फिर्याद दिली आहे. संबंधित सायबर चोरट्यांनी निवृत्त सुभेदारास मेसेज पाठविला होता. समाजमाध्यमावर प्रसारित होणाऱ्या जाहिराती तसेच ध्वनीचित्रफितीला दर्शक पसंती (लाइक्स) दिल्यास त्यात अल्पावधीत मोठा नफा मिळेल. प्रत्येक दर्शक पसंतीला पैसे देण्याचे आमिष दाखवून सुरुवातीला आरोपींनी तक्रारदार निवृत्त सुभेदाराच्या बँक खात्यात काही रक्कम पाठविली. विश्वास संपादन झाल्यानंतर आणखी नफा मिळविण्यासाठी तक्रारदार सायबर चोरट्यांच्या आमिषाला बळी पडले. या व्यवसायात गुंतवणूक केल्यास 10 ते 20 टक्के नफा मिळेल, असे आमिष दाखवून चोरट्यांनी त्यांना आपल्या जाळय़ात ओढून घेतले.
सायबर चोरट्यांनी त्यांच्याकडून वेळोवेळी विविध कारणे सांगत पैसे उकळले. तुम्हाला दिलेले उद्दिष्ट साध्य केल्यानंतर तुमच्या बँक खात्यात पैसे जमा करण्यात येणार असल्याचे चोरट्यांनी त्यांना सांगितले. निवृत्त सुभेदाराने चोरट्यांच्या खात्यात ऑनलाइन पद्धतीने एक कोटी दहा लाख रुपये वेळोवेळी जमा केले. त्यांनी नातेवाईकांकडून काही रक्कम उधारीवरही घेतली होती. ही रक्कमदेखील त्यांनी चोरट्यांना दिली. मात्र, त्यांना कोणताही परतावा आरोपींकडून देण्यात आला नाही किंवा गुंतवणूक रक्कम परत केली गेली नाही. त्यामुळे फसवणूक झाल्याचे लक्षात आल्यानंतर त्यांनी सायबर पोलीस ठाण्यात याबाबत तक्रार दिली. चोरट्यांनी पाच बँकातील 12 खात्यात संबंधित पैसे जमा करून घेतले असल्याचे पोलीस तपासात निष्पन्न झाले आहे. याप्रकरणी पोलीस निरीक्षक एस. सावंत पुढील तपास करत आहेत.
अधिक वाचा : राज्य उत्पादन शुल्क विभागाच्या महसुलात २५ टक्क्यांची वाढ
