खानापूर : खानापूर तालुक्यात महाशिवरात्रनिमित्त शिवालयांतून शिवनामाचा जय जयकार करत भाविकांनी महाशिवरात्रीनिमित्त मोठ्या भक्तीभावाने पूजन केले. तालुक्यातील सर्व शिवालयांतून भाविकांची गर्दी झाली होती. असोगा रामलिंगेश्वर मंदिर परिसरात तसेच स्वयंभू हब्बनहट्टी तीर्थक्षेत्रावर स्नानासाठी भाविकांची गर्दी झाली होती. तालुक्यातील नाथपंथीयांच्या डोंगरगाव, किरावळे, बाळेवाडी व हंडीभडंगनाथ मठावर भाविकांनी गर्दी केली होती. तसेच शनिवार दि. 9 रोजी आमावस्या असल्याने या दिवशीही अनेक ठिकाणी भाविकांची मोठी गर्दी होण्याची शक्यता आहे. सर्वच क्षेत्रावर आमावस्यानिमित्त महाप्रसादाचे आयोजन करण्यात आले आहे. खानापूर शहरातील मलप्रभा नदीतीरी असलेल्या पंचमुखी महादेव मंदिरात पहाटे रुद्राभिषेक, पूजा करण्यात आली. हेस्कॉम येथील महेश्वर महादेव मंदिर, कलमेश्वर मंदिरात अभिषेक व पूजा करण्यात आली. दिवसभर दर्शनासाठी भाविकांनी गर्दी केली होती. तसेच तालुक्यात मलप्रभेच्या तिरावरील शिव मंदिरातून मोठ्या भक्तीभावाने महाशिवरात्री महोत्सव साजरा करण्यात आला.
कणकुंबी येथील माउली मंदिर, हब्बनहट्टी येथील स्वयंभू हनुमान मंदिर, असोगा येथील रामलिंगेश्वर मंदिर, खानापूर मलप्रभा घाटातील महादेव मंदिर तसेच नाथपंथियांचे मठ असलेले डोंगरगाव, हंडीभडंगनाथ, बाळेवाडी, किरावळे या मठावर महाशिवरात्रीनिमित्त धार्मिक विधी करण्यात आले. तसेच तालुक्यातील गावोगावी शिवालयातून पूजा, अभिषेक आणि भजन करण्यात आले. काही ठिकाणी नाट्याप्रयोगाचेही आयोजन करण्यात आले होते. रात्रभर जागर करून भजन व पूजापाठ करण्यात आले. शनिवारी महाप्रसाद होणार आहे. हंडीभडंगनाथ मठावर शिवरात्रनिमित्त वेशेष पूजेचे आयोजन करण्यात आले होते. या ठिकाणी धारवाड, बेळगाव, गोवा इतर ठिकाणाहून भक्त मोठ्याप्रमाणात येतात. या ठिकाणी महाप्रसादाऐवजी प्रत्येकाला शिधा देण्याची प्रथा आहे. या शिधाचा भक्तलोक तेथेच प्रसाद करून भोजन करतात. अशी प्रथा अनेक वर्षापासून सुरू आहे. तसेच डोंगरगाव मठ, किरावळे मठ, बाळेवाडी मठ येथेही भजन, पूजन आणि महाप्रसादाचे आयोजन करण्यात आले आहे. सर्वच ठिकाणी भाविकांनी मोठ्या प्रमाणात गर्दी केली होती.
