पावसाळी खरेदीसाठी होंडा बाजारात गर्दी

सांखळी : सर्वसामान्यपणे पावसाळ्याची बेगमी करण्यासाठी मे महिन्यातील आठवडा बाजारात खरेदीसाठी मोठी गर्दी उसळते. राज्यातील पणजी, मडगाव, म्हापसा, फोंडा, सांखळी, वाळपई या प्रमुख शहरात आठवडा बाजार भरतो. शिवाय पावसाळी सामानाच्या विक्रीसाठी अन्य काही भागातही बाजार भरवला जातो. त्याठिकाणीही खरेदीसाठी नागरिकांचा चांगला प्रतिसाद मिळतो. होंडा आठवडा बाजारात सध्या खरेदीसाठी लोकांची गर्दी होत असल्याचे चित्र आहे.  डिचोली, सत्तरी तालुक्यात खाण व्यवसाय तसेच औद्यागिक वसाहती वाढल्या आहेत. त्यामुळे या भागात लोकवस्ती मोठ्या प्रमाणात वाढल्याचे चित्र आहे. मध्यंतरी खाण बंदीमुळे मंदावस्थेत गेलेला होंडा बाजार सध्या तेजीत आल्याचे चित्र आहे. रविवारी हा बाजार भरतो. सध्या पावसाळी खरेदी करण्यासाठी लोकांनी मोठी गर्दी केल्याचे पाहायला मिळाले.  सुकी मासळी, सोल, प्लास्टिक तरपॉलीन, तयार कपडे, मसाले, भाजी, शेव-बिस्किट, फळे, मासळी, फुले, मातीची भांडीकुंडी आदी समान विक्रीसाठी उपलब्ध होते. तसेच कांदे, बटाटे, टॉमॅटो आदीसह गावठी भाजीपाला, केळी, पपई, मिरची, भेंडी, सुरिंग आदी भाज्या विक्रीस उपलब्ध होत्या आठवडा बाजारासाठी पुन्हा दिवस चांगले आल्याचे दुकानदारांनी आणि भाजी विक्रेत्यांनी सांगितले.