पुणे / वार्ताहर :
भूकंपग्रस्त नसताना बनावट कागदपत्रे सादर करुन भूकंपग्रस्त कोटय़ातून पोलीस भरती होऊन शासनाची फसवणूक केल्याप्रकरणी एका पोलीस शिपायावर शिवाजीनगर पोलीस ठाण्यात गुन्हा दाखल करण्यात आला आहे.
गोविंद मधुकर इंगळे असे गुन्हा दाखल झालेल्या पोलीस शिपायाचे नाव आहे. सध्या इंगळे यांची नेमणूक शिवाजीनगर मुख्यालयात आहे. याबाबत सहायक पोलीस निरीक्षक प्रविण संपतराव अब्दागिरे यांनी फिर्याद दिली आहे. हा प्रकार ऑक्टोबर 2021 पासून घडला आहे. याबाबत पोलिसांनी दिलेल्या माहितीनुसार, ऑक्टोबर 2021 मध्ये शिवाजीनगर पोलीस मुख्यालयात पोलीस शिपाई भरती घेण्यात आली होती. त्यात इंगळे याने भूकंपग्रस्त कोटय़ातून अर्ज केला होता. त्यात त्याची निवड झाली. त्याच्या कागदपत्रांची पडताळणी करण्यात आल्यावर त्याने बनावट कागदपत्र सादर करुन भूकंपग्रस्त कोटय़ातून नोकरी मिळविल्याचे निष्पन्न झाले. शासनाची फसवणूक केल्याप्रकरणी इंगळे याच्यावर गुन्हा दाखल करण्यात आला आहे. पुढील तपास शिवाजीनगर पोलीस करत आहेत.
