सिव्हिल हॉस्पिटलसमोरील पदपथावरील चेंबरला झाकण बसवा

बेळगाव : स्मार्ट सिटीमध्ये शहराचा समावेश झाल्यानंतर रस्ते तसेच इतर विकासकामे करण्यात आली. पदपथाचीही निर्मिती करण्यात आली. मात्र या पदपथावर असलेले चेंबर बऱ्याच ठिकाणी खुले आहेत. त्यामुळे अपघात घडण्याची शक्यता आहे. सिव्हिल हॉस्पिटल रोडवरही धोकादायक चेंबर असून अपघात घडण्यापूर्वी तातडीने त्यावर झाकण बसवावे, अशी मागणी या परिसरातील व्यावसायिक व नागरिकांतून होत आहे. स्मार्ट सिटीतून शहराचा कायापालट करण्याची वल्गना करण्यात आली. मात्र अनेक कामे निकृष्ट दर्जाचे असल्याच्या तक्रारी वाढल्या आहेत. वास्तविक विकासकामे करताना त्याचा दर्जा राखणे गरजेचे होते. मात्र दर्जाहीन कामे झाली असून काही दिवसातच या कामांचा दर्जा उघडा पडला आहे. अनेक गटारींचे कामे अर्धवट स्थितीत आहेत. ड्रेनेजची समस्यादेखील नित्याचीच बाब आहे. अनेक ठिकाणी ड्रेनेजचे पाणी रस्त्यावरून वाहत आहे. शहरामध्ये सायकल ट्रॅक, पदपथ बांधण्यात आले. मात्र सायकल टॅकचा उपयोगच झाला नाही. तर पदपथावर अनेक ठिकाणी अर्धवट कामे ठेवण्यात आली आहेत. सिव्हिल हॉस्पिटल रोडवरही पदपथाची बांधणी करण्यात आली. त्याठिकाणी अतिक्रमणे करून व्यवसाय थाटले. त्यानंतर महापालिकेने ते अतिक्रमणे हटविली. मात्र अशाप्रकारे चेंबरला झाकण नसल्याने ती धोकादायक बनू लागली. तेव्हा तातडीने त्यावर झाकण बसवावे, अशी मागणी होत आहे.