ऍपच्या माध्यमातून घरबसल्या सुविधा

सुविधांचा वापर करण्याकडे शहरवासियांचे दुर्लक्ष

प्रतिनिधी /बेळगाव

स्मार्ट सिटी योजनेंतर्गत विकासकामांसह स्मार्ट सुविधादेखील उपलब्ध करण्यात आल्या आहेत. कर भरणा, व्यवसाय परवाना, शहरातील बसचे वेळापत्रक तसेच अन्य सुविधा ‘माय बेळगावी’ या ऍपवर उपलब्ध करण्यात आल्या आहेत. मात्र या सुविधांचा वापर करण्याकडे शहरवासियांचे दुर्लक्ष झाले असल्याचे निदर्शनास आले आहे.

शहरवासियांना विविध सुविधा उपलब्ध करून देण्यासाठी स्मार्ट सिटी योजनेची अंमलबजावणी करण्यात आली आहे. नागरी सुविधांसह घरबसल्या काम करण्यासाठी स्मार्ट सुविधादेखील उपलब्ध करण्याची तरतूद यामध्ये करण्यात आली होती. यापैकी काही योजना अमलात आणल्या आहेत. तर काही योजनांकडे स्मार्ट सिटीचे दुर्लक्ष झाले आहे. केवळ शहरातील रस्त्यांचा विकास करण्यात आल्याची माहिती शहरवासियांना आहे. अन्य स्मार्ट सुविधांची माहिती शहरवासियांपर्यंत पोहोचली नसल्याने याचा वापर होत नसल्याचे स्मार्ट सिटी कंपनीच्या निदर्शनास आले आहे. स्मार्ट सीटीमध्ये स्मार्ट बसथांबे उभारण्यात आले आहेत. मात्र बसथांब्यांची देखभाल व्यवस्थित केली जात नाही. त्यामुळे सदर बसथांबे भटक्मया जनावरांचे आश्रयस्थान बनले आहेत. स्मार्ट बसथांब्याबरोबर बस प्रवाशांच्या सुविधेसाठी बस वेळापत्रक आणि बस कोणत्या ठिकाणी आहे? याची माहिती मिळण्याची सुविधा मोबाईल ऍपवर उपलब्ध करण्यात आली आहे. स्मार्ट फोन वापरणाऱया प्रत्येक मोबाईलधारकाला ही माहिती उपलब्ध होऊ शकते.

पण या ऍपची माहिती नागरिकांना नाही. त्यामुळे या सुविधेचा वापर होत नाही. तसेच मालमत्ता कर, व्यवसाय परवाना तसेच महापालिकेकडून उपलब्ध असलेल्या सुविधांचा लाभ घेण्यासाठी महापालिका कार्यालयात जावे लागते. वास्तविक पाहता या सुविधादेखील मोबाईलवरील ऍपवर उपलब्ध करण्यात आल्या आहेत. स्मार्ट सिटीच्या ‘माय बेळगावी’ या ऍपवर विविध विभाग करण्यात आले असून, त्या अंतर्गत शहरवासियांना घरबसल्या माहिती घेता येवू शकते.

डिस्कव्हर