तातडीने घेतली आढावा बैठक
प्रतिनिधी / मडगाव
जिल्हा पंचायत निवडणुकीत काँग्रेस पक्षाचा दारूण झाल्यानंतर काँगेस पक्षाचे नेते खडबडून जागे झाले व त्यांनी तातडीने काल बुधवारी दक्षिण गोवा जिल्हा काँग्रेस कार्यालयात आढावा बैठक घेतली. या बैठकीला काँग्रेस प्रदेश अध्यक्ष अमित पाटकर, विधीमंडळ गटनेते युरी आलेमाव, वरि÷ उपाध्यक्ष एम. के. शेख तसेच दवर्ली जिल्हा पंचायत पोट निवडणुकीतील काँग्रेसचे उमेदवार लिओन्सियो रायकर इत्यादी उपस्थित होते.
या आढावा बैठकीत काँग्रेस पक्ष तळागाळात मजबूत करण्याच्या दिशेने पाऊल टाकले जाणार असल्याचे काँग्रेस प्रदेश अध्यक्ष अमित पाटकर यांनी सांगितले.
आम्ही कुठ्ठाळी जिल्हा पंचायत उमेदवार वेलेंट बार्बोसा आणि कुठ्ठाळी मतदारसंघातील आमच्या कार्यकर्त्यांनाही भेटलो आणि निकालांचा आढावा घेतला. आम्ही त्वरित पाऊले उचलून काँग्रेस पक्ष मजबूत करण्यासाठी सुधारात्मक उपाय करू असे युरी आलेमाव यांनी म्हटले आहे.
या बैठकांना सरचिटणीस सुभाष फळदेसाई आणि प्रदीप नाईक, कॅप्टन विरिएटो फर्नांडिस, ओलेन्सियो सिमोयस, एव्हरसन वालीस, ऑर्विल दौराद रॉड्रिग्स, सुकूर, पीटर डिसोझा आणि इतर पदाधिकारी उपस्थित होते.
आम्ही एकंदर आढावा घेतला असून आम्ही आतापासून काम सुरू करू. आवश्यक निर्णय घेवून योग्य पाऊले उचलण्याचा आणि उणीवा दूर करण्याचा आम्हाला विश्वास आहे, असे एम के शेख म्हणाले.
जिल्हा पंचायत निवडणुकीत काँग्रेस पक्षाची प्रचंड पिछेहाट झाली. आम आदमी पक्ष व आरजीने त्या मानाने चांगली कामगिरी केली. दवर्ली जिल्हा पंचायत निवडणुकीत आम आदमी पक्षाने आणखीन थोडा जोर लावला असता तर या मतदारसंघाचा निकाल बदलला असता. काँग्रेस पक्षासमोर आत्ता भाजप बरोबरच आम आदमी पार्टी तसेच आरजी असे तिहेरी आव्हान आहे. यातून काँग्रेस पक्ष कसा मार्ग काढतो यावर बरेच काही अवलंबून आहे.
