पुणे / वार्ताहर :
येरवडा मध्यवर्ती कारागृहात कुख्यात गुंड गजानन मारणे टोळीतील काही गुन्हेगारांनी गोंधळ घातला. संबधित आरोपीने एकाच्या डोक्यात पाट घातल्याने तो गंभीर जखमी झाला असून, त्यावर रुग्णालयात उपचार सुरू आहेत.
पुण्यातील येरवडा मध्यवर्ती कारागृहात विविध बराकीत मोक्का कारवाई केलेले वेगवेगळय़ा गुन्हेगारी टोळीतील 700 ते 800 गुन्हेगार बंदिस्त आहेत. बुधवारी दुपारी कॅरम खेळत असताना दोन कैद्यांमध्ये वाद झाला. त्यावेळी कारागृहातील रक्षकांनी भांडणे सोडवली आणि त्यानंतर सर्वांना जवळील बराकीत बंद करण्यात आले. दरम्यान, बुधवारी रात्री कैदी तपासणी सुरू असताना गुंडांच्या टोळीमध्ये पुन्हा वाद उफाळला. यावेळी एकाने दुसऱ्या टोळीच्या गुन्हेगाराच्या डोक्यात पाट घातल्याने त्यात तो गंभीर जखमी झाला. यावेळी कारागृह रक्षकांनी भांडणे सोडवली आणि त्यानंतर संबंधित सर्व गुन्हेगारांची वेगवेगळय़ा बराकीत रवानगी करण्यात आली.
या प्रकारानंतर रात्री आवश्यक ती काळजी घेऊन कैद्यांना आता वेगवेगळय़ा बराकीत ठेवण्यात आले आहे. त्यांचे जबाब घेऊन येरवडा पोलीस ठाण्यात कायदेशीर तक्रार दाखल करण्यात येणार असल्याचे येरवडा कारागृहातील अधीक्षक राणी भोसले यांनी सांगितले.
