वार्ताहर /हिंडलगा
बेळगाव ग्रामीण मतदार संघातील महाराष्ट्र एकीकरण समितीचे अधिकृत उमेदवार आर. एम. चौगुले यांच्या गणेशपूर परिसरातील प्रचारफेरीला उत्स्फूर्त प्रतिसाद मिळाला. नागरिकांनी स्वयंस्फूर्तीने प्रचारफेरीत सहभाग दर्शवून मतदारांच्या घरोघरी भेटी घेत समितीला विजयी करण्यासाठी चौगुले यांच्या पाठीशी खंबीरपणे राहण्याचे आवाहन केले. बुधवार दि. 26 रोजी सकाळी गणेशपूर भागातील ज्योतीनगर, लक्ष्मीनगर, शिवमनगर, रक्षक कॉलनी, सिंडिकेट कॉलनी, क्रांतीनगर, सरस्वतीनगर आदी भागात समिती उमेदवार चौगुले यांच्या प्रचारार्थ भव्य प्रचारफेरी काढण्यात आली. प्रारंभी स्वातंत्र्यसैनिक सीमा सत्याग्रही प्रा. कृष्णा मेणसे यांचा आशीर्वाद घेऊन प्रचाराला सुरुवात केली. यावेळी निवृत्त प्राचार्य आनंद मेणसे, व्ही. एम. पाटील यांनी चौगुले यांना शुभेच्छा दिल्या.
मराठी भाषा-संस्कृतीसाठी तत्पर
ठिकठिकाणी महिला व युवकांनी प्रचारफेरीचे जल्लोषात स्वागत केले. सुवासिनींनी चौगुले यांचे औक्षण करून विजयासाठी आशीर्वाद दिला. नागरिकांनी म. ए. समितीच्या पाठीशी एकनिष्ठ राहून मराठी भाषा व संस्कृती टिकविण्यासाठी सदैव तत्पर असल्याचे सांगितले. फेरीत सहभागी युवकांनी संयुक्त महाराष्ट्राच्या घोषणा देत परिसर दणाणून सोडला. प्रचारफेरीत माजी आमदार मनोहर किणेकर, माजी महापौर शिवाजी सुंठकर, जि. पं. माजी सदस्या माधुरी हेगडे, ग्रा. पं. अध्यक्षा प्रेमा हिरोजी, सदस्य उमेश चोपडे, ज्येष्ठ पंच पिराजी पाटील, अण्णा पाटील, कृष्णा पाटील, बाळू पाटील, जयवंत नेवगिरी, धाकलू पाटील, प्रदीप तांजी, नीलकंठ पाटील, धर्मराज नेवगिरी, मल्लाप्पा पाटील, नागेंद्र हुंद्रे, मोहन गरग, सहदेव हिरोजी, रमेश हिरोजी, गजानन पाटील, विष्णू पाटील, जयवंत होंडेकर, जि.पं. माजी सदस्या प्रेमा मोरे, मनोज पावशे, निंगाप्पा मोरे, अनंत तुडयेकर, सुरेश राजूकर यांच्यासह पदाधिकारी, लोक्रतिनिधी, कार्यकर्ते, महिला व नागरिक मोठ्या संख्येने उपस्थित होते.
आज बाळेकुंद्री परिसरात प्रचार
बाळेकुंद्री खुर्द येथून दि. 27 रोजी समिती उमेदवाराच्या प्रचाराला सकाळी 7 वा. सुरुवात होणार आहे. त्यानंतर पंत बाळेकुंद्री, होनिहाळमध्ये प्रचारफेरी काढली जाणार आहे. सायंकाळी 5 वा. निलजी व मुतगा गावांमध्ये प्रचार पदयात्रा काढण्यात येणार आहे.
