सुरक्षा दलांच्या ताफ्याकरता कोड भाषेचा करावा वापर

नवी दिल्ली : सैन्य आणि व्हीआयपी मूव्हमेंटदरम्यान रेडिओ सेटवर कोड आणि सांकेतिक शब्दांचा वापर केला जावा असा निर्देश केंद्र सरकारकडून सर्व राज्यांच्या पोलिसांना देण्यात आला आहे. रेडिओ सेटवर थेट नामोल्लेख टाळण्याची सूचना करण्यात आली आहे. रेडिओ सेटवर राष्ट्रीय सुरक्षेशी निगडित कुठलाही तपशील शेअर करणे पोलिसांनी टाळावे असे केंद्र सरकारच्या निर्देशात म्हटले गेले आहे. रेडिओ सेटवरील संभाषण शत्रू ट्रक करू शकतो. अशा स्थितीत सुरक्षेसाठी मोठा धोका उद्भवण्याची शक्यता आहे. याचमुळे रेडिओ सेटवर थेट नामोल्लेख टाळण्यास सांगण्यात आले आहे. जम्मू-काश्मीरमध्ये अलिकडेच सैन्याच्या ताफ्यातील वाहनावर हल्ला झाला होता. या हल्ल्यात 5 सैनिकांना हौतात्म्य प्राप्त झाले होते. हे सैनिक  एका गावातून परतत असताना दहशतवाद्यांनी हल्ला केला होता. तर अलिकडच्या काळात अनेक व्हीआयपींच्या सुरक्षेत चूक झाल्याच्या घटना समोर आल्या आहेत. या घटना विचारात घेत केंद्र सरकारने राज्याच्या सुरक्षा दलांना रेडिओ सेटवर कोड भाषेचा वापर करण्याची सूचना केली आहे.