कोल्हापुरात ऐतिहासिक ‘शिवशस्त्र शौर्यगाथा’ प्रदर्शन आठ महिन्यांसाठी खुले
कोल्हापूर : ‘शिवशस्त्र शौर्यगाथा’ या अद्वितीय ऐतिहासिक प्रदर्शनाचा उद्घाटन सोहळा मंगळवारी पार पडला असून दोन दिवसात पाच हजाराहून अधिक नागरिकांनी या प्रदर्शनाला भेट दिली. जिल्हाधिकारी अमोल येडगे यांनी या प्रदर्शनासाठी करण्यात आलेल्या सर्व व्यवस्थेचा आढावा घेतला आणि आवश्यक सुधारणा आणि सोयींबाबत बैठकीतून सूचना दिल्या.
हे प्रदर्शन पुढील ८ महिन्यांसाठी सुरू राहणार आहे. या कालावधीत शालेय व महाविद्यालयीन स्तरावर विविध स्पर्धा आणि उपक्रम राबविण्यात येणार आहेत. या स्पर्धामध्ये वक्तृत्व, निबंध लेखन आणि अनुभव लेखन स्पर्धांचा समावेश असेल. या माध्यमातून नव्या पिढीला छत्रपती शिवाजी महाराजांचा पराक्रम, शौर्य आणि ऐतिहासिक वारसा यांची ओळख करून देणे हा उद्देश असल्याचे जिल्हाधिकारी येडगे यांनी सांगितले.
विद्यार्थ्यांनी प्रदर्शनाला भेट दिल्यानंतर ‘माझा अनुभव’ या स्वरूपात लेखन सादर करायचे आहे. तसेच, युनेस्कोने जागतिक वारसा स्थळांचा दर्जा दिलेल्या बाराही किल्ल्यांच्या अनुषंगाने निबंधही लिहायचे आहेत. सर्व स्पर्धक विद्यार्थ्यांना शिक्षण विभागाच्यावतीने प्रमाणपत्रे प्रदान केली जाणार आहेत. याशिवाय, शालेय स्तरावर वक्तृत्व स्पर्धा घेऊन विद्यार्थ्यांना इतिहासाबद्दल जाणिवा निर्माण करण्याचे प्रयत्न शिक्षाण विभागाद्वारे करण्यात येतील.
याबाबत जिल्हाधिकारी अमोल येडगे यांच्या अध्यक्षतेखाली जिल्हाधिकारी कार्यालयातील बैठकीला जिल्हा परिषदेचे मुख्य कार्यकारी अधिकारी कार्तिकयन एस., निवासी उपजिल्हाधिकारी संजय तेली, पोलीस उपअधीक्षक तानाजी सावंत, पुरातत्त्व विभागाचे समन्वयक उत्तम कांबळे, शिक्षणाधिकारी मीना शेंडकर तसेच अधिकारी उपस्थित होते.
नागरिकांसाठी चांगल्या सुविधा उपलब्ध करून देणे, स्वच्छता राखणे, तसेच वृद्ध आणि लहान मुलांसाठी विशेष व्यवस्था करणे याबाबत संबंधित विभागांना जिल्हाधिकाऱ्यांनी निर्देश दिले. त्यांनी पुरातत्व खात्याला शहरातील महत्वाच्या ठिकाणी प्रदर्शन स्थळाकडे जाण्यासाठी दिशादर्शक फलक लावण्याच्या सूचना केल्या. प्रदर्शन रोज सकाळी १० वाजता ते सायंकाळी ५.३० वाजेपर्यंत खुले असून, दर सोमवारी प्रदर्शन बंद राहणार आहे. सुरक्षा आणि सांस्कृतिक वारशाचे रक्षण लक्षात घेऊन नागरिकांना प्रदर्शनस्थळी कक्षात मोबाईल फोन घेऊन जाण्यास परवानगी दिली जाणार नाही. शिक्षण विभागाला जिल्ह्यातील शाळा आणि महाविद्यालयांना समाविष्ट करून दररोज नियोजनबद्ध पद्धतीने विद्यार्थ्यांना प्रदर्शन दाखविण्याच्या सूचना केल्या आहेत.
