बहुउद्देशीय व्यापार संकुलाचे मुख्यमंत्र्यांच्या हस्ते उद्घाटन

बेळगाव : स्मार्ट सिटी योजनेतून कलामंदिरच्या आवारात उभारण्यात आलेल्या बहुउद्देशीय व्यापार संकुलाचे रविवारी मुख्यमंत्री सिद्धरामय्या यांच्या हस्ते उद्घाटन करण्यात आले. यावेळी पालकमंत्री सतीश जारकीहोळी, महिला व बालकल्याण मंत्री लक्ष्मी हेब्बाळकर व इतर मान्यवर उपस्थित होते. स्मार्ट सिटी योजनेतून बहुउद्देशीय व्यापार संकुल उभारण्यासाठी 56 कोटी रुपयांचा निधी खर्च करण्यात आला आहे. दोन एकर जागेत भव्य संकुल उभारण्यात आले असून त्या ठिकाणी तळघरासह विविध गाळे उभारण्यात आले आहेत. कलामंदिरची योजना केंद्र आणि राज्य सरकारच्या 50-50 टक्के भागीदारीत राबविण्यात आली आहे. लिलाव प्रक्रियेतून गाळ्यांचे वितरण केले जाणार असून या माध्यमातून मिळणाऱ्या पैशाचा बेळगाव शहराच्या विकासासाठी उपयोग केला जाणार आहे. शहरातील काही उर्वरित प्रकल्प देखील लवकरच पूर्ण केले जाणार असून त्यांचेही लवकरच लोकार्पण केले जाणार आहे. मुख्यमंत्री सिद्धरामय्या यांच्या हस्ते बहुउद्देशीय व्यापार संकुलाच्या उद्घाटनाचे औचित्य साधून नामफलकाचे अनावरण करण्यात आले. यावेळी आमदार राजू सेठ, विधान परिषद सदस्य चन्नराज हट्टीहोळी, अशोक पट्टण, बुडा अध्यक्ष लक्ष्मण चिंगळे यांच्यासह मान्यवर उपस्थित होते.