छत्तीसगड काँग्रेस अध्यक्षपदी बैज

रायपूर  : छत्तीसगड राज्याच्या काँग्रेस अध्यक्षपदी खासदार दीपक बैज यांची नियुक्ती करण्यात आली आहे. मोहन मर्कम यांच्याजागी त्यांची नियुक्ती करण्यात आली आहे. बैज हे आदीवासी समाजातील तरुण नेते आहेत. येत्या डिसेंबरमध्ये राज्यात विधानसभा निवडणूक होत आहे. त्या पार्श्वभूमीवर ही नियुक्ती झाली आहे. बैज हे खासदार होण्यापूर्वी चित्रकोट विधानसभा मतदारसंघातील आमदार म्हणून दोनदा निवडून आले आहेत. 2019 च्या लोकसभा निवडणुकीत बस्तर मतदारसंघात खासदार म्हणून निवडून आल्यानंतर त्यांनी आमदारपद सोडले होते. छत्तीसगडच्या 11 लोकसभा जागांपैकी काँग्रेसला दोन जागा आहेत. तर भारतीय जनता पक्षाला 9 जागा मिळाल्या आहेत. आगामी विधानसभा निवडणूक भाजप आणि काँग्रेस या दोन्ही पक्षांसाठी महत्वाची मानण्यात आली असून दोन्ही पक्ष आतापासूनच सज्ज होत आहेत.