लोणावळा : पुणे-मुंबई एक्स्प्रेस वेवर मुंबईच्या दिशेने जाणारा केमिकल टँकर दुभाजकाला धडकला. त्यानंतर टँकरने पेट घेतला. टँकर जळत असताना टँकरमधील केमिकल ब्रीजखालून जाणाऱ्या इतर गाडय़ांवरही पडले त्यामुळे त्या गाडय़ांनीही पेट घेतला. या दुर्देवी घटनेत 4 जणांचा होरपळून मृत्यू झाला असून, तीन जण जखमी झाले आहेत. आज सकाळी साडेअकरा वाजण्याच्या सुमारास ही घटना घडली.
या दुर्घटनेत ब्रीजखाली व ब्रीजच्या वर दोन्हीकडे आगीचे मोठमोठे लोट उसळले होते. आगीची माहिती समजताच लोणावळा शहर पोलीस, खंडाळा महामार्ग पोलीस, आयआरबी, देवदूत यंत्रणा व इतर सामाजिक संघटनांचे सदस्य यांनी घटनास्थळी धाव घेतली. अग्नीशमन दलाची पथके देखील घटनास्थळी दाखल झाली व आग विझविण्याचे शर्तीचे प्रयत्न सुरु झाले. त्यातच पाऊस देखील आल्याने आग विझविण्यास मदत झाली. खबरदारीचा उपाय म्हणून एक्स्प्रेस वे बंद करण्यात आला होता. दुपारी दीडनंतर आग नियंत्रणात आल्यानंतर पुण्याच्या दिशेने जाणारी वाहतूक सुरु करण्यात आली तर मुंबईच्या दिशेने जाणारी वाहतूक लोणावळा शहरातून वळविण्यात आली होती.
अपघातामुळे पुणे-मुंबई एक्स्प्रेस वे व पुणे-मुंबई राष्ट्रीय महामार्गावर मोठय़ा प्रमाणात वाहतूककोंडी झाल्याने वाहनचालक व प्रवाशी यांना मोठा मनस्ताप सहन करावा लागला. जखमीवर सोमाटणे येथील खाजगी रुग्णालयात उपचार सुरु आहेत. लोणावळा विभागातील वरिष्ठ पोलीस अधिकारी व महामार्गच्या वरिष्ठ पोलीस अधिकाऱ्यांनी घटनास्थळी भेट देत अपघाताची माहिती घेतली. नागरिक देखील मोठय़ा संख्येने जमले होते. मयत व्यक्तीपैकी दोन जण कुणेगाव येथील स्थानिक असून उर्वरित दोन जण टॅकरमधील आहेत.
या अपघातात पुलाच्या खालून दुचाकीवरून जाणाऱ्यांपैकी कुशल कैलास वरे (वय 9) व रितेश महादू कोशिरे (17) या दोघांचा मृत्यू झाला असून, सविता कैलास वरे (33) या गंभीर जखमी झाल्या आहेत. ते तिघेही राजमाची कुणेगाव येथील रहिवासी आहेत. टँकर चालक या अपघातात मयत झाला असून अन्य दोन जण जखमी आहेत. त्यांची नावे अद्याप समजू शकलेली नाहीत.
