मोहीम गंतव्यस्थानाच्या समीप : आता 17 ऑगस्ट ठरणार महत्त्वाचा दिवस
वृत्तसंस्था /नवी दिल्ली
इस्रोची चांद्रयान-3 मोहीम गंतव्यस्थानाच्या अगदी जवळ पोहोचली आहे. चांद्रयान-3 ने चंद्राच्या कक्षेतील आणखी एक चक्राकार टप्पा यशस्वीरित्या पूर्ण केला असून आता अवकाशयान चंद्राच्या जवळच्या कक्षेत पोहोचले आहे. आता चांद्रयान 150 किमी × 177 किमीच्या कक्षेत आले आहे. अर्थातच त्याचे चंद्रापासून किमान अंतर 150 किमी आणि कमाल अंतर 177 किमी आहे. चांद्रयान-3 ने आता चंद्राच्या चौथ्या कक्षेत प्रवेश केला असल्याचे इस्रोने सोमवारी सांगितले. चांद्रयान-3 आता 16 ऑगस्ट रोजी आणखी एक कक्षा कमी करून चंद्राच्या जवळ येईल. त्यानंतर 17 ऑगस्टचा दिवस मिशनसाठी महत्त्वाचा असेल. या दिवशी चांद्रयान-3 चे प्रोपल्शन मॉड्यूल लँडरपासून वेगळे केले जाईल. यानंतर 23 ऑगस्ट रोजी चांद्रयान-3 चंद्राच्या पृष्ठभागावर उतरणार असून त्याकडे संपूर्ण जगाचे लक्ष केंद्रीत झालेले असेल.
चांद्रयान-3 चे थ्रस्टर 14 ऑगस्ट रोजी दुपारी 12:45 वाजता सक्रिय केल्यानंतर आपली कक्षा यशस्वीरित्या बदलली. 5 ऑगस्ट रोजी चांद्रयान-3 ने प्रथमच चंद्राच्या कक्षेत प्रवेश केल्यापासून ते तीन वेळा आपली कक्षा बदलून चंद्राच्या जवळ पोहोचले आहे. आता चांद्रयान-3 चंद्रापासून 150 किमी अंतराच्या कक्षेत 1,900 किमी प्रतिसेकंद या वेगाने प्रवास करत आहे. चांद्रयानचा परिभ्रमण टप्पा सुरू असून ते लंबवर्तुळाकार कक्षेतून जवळपास वर्तुळाकार कक्षेत आले आहे. चांद्रयान-3 मिशनमध्ये लँडर, रोव्हर आणि प्रोपल्शन मॉड्यूलचा समावेश आहे. लँडर आणि रोव्हर चंद्राच्या दक्षिण ध्रुवावर उतरतील आणि 14 दिवस प्रयोग करतील. दुसरीकडे, प्रोपल्शन मॉड्यूल चंद्राच्या कक्षेत राहून चंद्राच्या पृष्ठभागावऊन येणाऱ्या किरणांचा अभ्यास करेल. या मोहिमेद्वारे इस्रो चंद्राच्या पृष्ठभागावरील पाण्याचा शोध घेईल आणि चंद्राच्या पृष्ठभागावर भूकंप कसे होतात हे देखील जवळून पाहणार आहे.
चांद्रयानाने पाठवली छायाचित्रे
चांद्रयान पहिल्यांदा चंद्राच्या कक्षेत दाखल झाले तेव्हा त्याची कक्षा 164 किमी × 18,074 किमी होती. कक्षेत प्रवेश करताना त्याच्या ऑनबोर्ड पॅमेऱ्यांनी चंद्राची छायाचित्रेही टिपली. इस्रोने त्याचा व्हिडिओ बनवून आपल्या वेबसाईटवर शेअर केला आहे. या छायाचित्रांमध्ये चंद्रावरील ख•s स्पष्टपणे दिसत आहेत.
