आजपासून गडगडाटासह मुसळधार पावसाची शक्यता

पणजी ; गोव्यात मंगळवार म्हणजे आजपासून सर्वत्र गडगडाटासह पाऊस पडणार असल्याचा अंदाज हवामान खात्याने व्यक्त केला आहे. गुजरातकडे सरकत असलेल्या ‘बिपरजॉय’ चक्रीवादळाचा परिणाम म्हणून गोव्यातही समुद्र खवळलेला आहे. समुद्रातून पाण्याच्या लाटा 3 मीटरपर्यंत उंच उसळत आहेत. राज्यात मान्सूनचे आगमन रविवारी झाले असले तरी सोमवारी मात्र पावसाने पाठ फिरविली. आजपासून दि. 16 जूनपर्यंत गोव्यात सर्वत्र विजांचा चमचमाट, ढगांचा गडगडाटासह पाऊस पडेल असा अंदाज हवामान खात्याने काल सोमवारी जाहीर केला. गोव्यातील समुद्रकिनाऱ्यांवर लाटा मोठ्या प्रमाणात उसळण्याची शक्यता आहे. पारंपरिक मच्छीमारांना मासेमारीसाठी पूर्णत: बंदी जाहीर केली आहे. अरबी समुद्र खवळलेला आहे. जोरदार वारे वाहू लागलेले आहे. वाऱ्याचा वेग ताशी 55 ते 65 किमीपर्यंत जाऊ शकतो. दरम्यान, गेल्या 24 तासांमध्ये गोव्यात सर्वत्र समाधानकारक पाऊस झाला. म्हापसा – 1 इंच, पेडणे, पणजी, काणकोण येथे प्रत्येकी 1 इंच व त्यापेक्षाही जादा पाऊस पडला. फोंडा, सांखळी, दाबोळी, मुरगाव येथे प्रत्येकी अर्धा इंच पावसाची नोंद झाली. केपे, सांगे व मडगाव येथे अर्ध्या इंचापेक्षा कमी पाऊस पडला.