पुणे / प्रतिनिधी :
अभियांत्रिकी, औषधनिर्माणशास्त्र आणि कृषी अभ्यासक्रमाच्या प्रवेशासाठी अनिवार्य असलेल्या राज्य सामाईक प्रवेश परीक्षेचा (एमएचटी-सीईटी) निकाल राज्य सामायिक प्रवेश परीक्षा कक्षाने (सीईटी सेल) सोमवारी सकाळी 11 वाजता ऑनलाइन पद्धतीने जाहीर केला. त्यानुसार भौतिकशास्त्र, रसायनशास्त्र, गणित (पीसीएम) गटात 14 विद्यार्थ्यांनी आणि भौतिकशास्त्र, रसायनशास्त्र, जीवशास्त्र (पीसीबी) गटात 14 विद्यार्थ्यांनी शंभर पर्सेंटाईल मिळविले.
राज्य सामायिक प्रवेश परीक्षा कक्षातर्फे (सीईटी सेल) विविध पदवी-पदव्युत्तर अभ्यासक्रमांच्या प्रवेशासाठीच्या सीईटी घेतल्या जातात. राज्य सीईटी सेलमार्फत ही परीक्षा 36 जिह्यांच्या ठिकाणी 197 परीक्षा केंद्रांवर घेण्यात आली. यापैकी 181 केंदे ही महाराष्ट्रात आणि 16 केंदे ही महाराष्ट्राच्या बाहेर होती.
पीसीएम गटातून 3 लाख 13 हजार 730, तर पीसीबी गटातून 2 लाख 77 हजार 400 अशा एकूण 5 लाख 91 हजार 130 विद्यार्थ्यांनी परीक्षा दिली. 92.93 टक्के इतकी विद्यार्थ्यांच्या हजेरीची टक्केवारी आहे. आतापर्यंत सव्वा दोन लाख विद्यार्थ्यांनी कोणत्याही तांत्रिक अडथळय़ाविना स्वतःच्या गुणपत्रिका ऑनलाइन प्राप्त केल्या आहेत. राखीव गटातून पहिल्या आलेल्या विद्यार्थ्यांची यादी सीईटी सेलच्या संकेतस्थळावर देण्यात आली आहे. http://www.mahacet.org आणि http://www.mahacet.in या अधिकृत संकेतस्थळावर विद्यार्थ्यांना निकाल पाहता येणार आहे.
