भरधाव कारने मोटारसायकलला ठोकरल्याने कित्तूरनजीक सेंट्रींग कामगाराचा मृत्यू

बेळगाव : भरधाव कारने मोटारसायकलला ठोकरल्याने पुडकलकट्टी, ता. गोकाक येथील एका सेंट्रींग कामगाराचा मृत्यू झाला. पुणे-बेंगळूर राष्ट्रीय महामार्गावर कित्तूरजवळ बुधवारी सकाळी ही घटना घडली. या अपघातात आणखी दोघे जण जखमी झाले आहेत. बसवराज रामाप्पा तळकटनाळ (वय 24) रा. पुडकलकट्टी असे अपघातात मृत्युमुखी पडलेल्या दुर्दैवी तरुणाचे नाव आहे. सन्नविठ्ठल गोविंदप्पा दुरदुंडी, रा. मक्कळगेरी, निंगाप्पा विठ्ठल हेब्बाळ, रा. नागनूर, ता. मुडलगी अशी जखमींची नावे असून त्यांच्यावर सिव्हिल हॉस्पिटलमध्ये उपचार करण्यात येत आहेत. यासंबंधी कागवाडचे आमदार राजू कागे यांचे पुतणे श्रीप्रसाद सिदगौडा कागे (वय 33) रा. उगार खुर्द व सन्नविठ्ठल दुरदुंडी या दोघा जणांवर कित्तूर पोलीस स्थानकात एफआयआर दाखल करण्यात आला आहे. बुधवार दि. 2 एप्रिल रोजी सकाळी 8.30 वाजण्याच्या सुमारास कित्तूरजवळ हा अपघात घडला आहे. अपघातात गंभीर जखमी झालेल्या बसवराजला सिव्हिल हॉस्पिटलला हलविताना वाटेतच त्याचा मृत्यू झाला आहे. घटनेची माहिती समजताच कित्तूरचे पोलीस उपनिरीक्षक प्रवीण गंगोळ व त्यांच्या सहकाऱ्यांनी घटनास्थळी धाव घेतली.