पुणे / वार्ताहर :
शिक्षण विभागात शिक्षकपदावर नोकरी लावून देतो, असे सांगून सुमारे 45 जणांची आर्थिक फसवणूक करण्यात आल्याचा प्रकार समोर आला असून, याप्रकरणी परीक्षा परिषदेच्या आयुक्त शैलजा रामचंद्र दराडे (रा. पाषाण, पुणे) यांच्यासह त्यांच्या भावाविरोधात हडपसर पोलीस ठाण्यात गुन्हा दाखल करण्यात आल्याची माहिती पोलिसांनी दिली.
दादासाहेब रामचंद्र दराडे (रा. अकोले. ता. इंदापूर, पुणे) असे शैलजा दराडे यांच्या भावाचे नाव आहे. याबाबत सांगली जिल्हयातील एका 50 वषीय शिक्षकाने हडपसर पोलीस ठाण्यात परिक्षा परिषदेच्या आयुक्त व त्यांच्या भावाविरोधात तक्रार दाखल केली आहे. सदरचा प्रकार 15 जून 2019 ते आतापर्यंत घडलेला आहे.
पोलिसांनी दिलेल्या माहितीनुसार, शैलजा रामचंद्र दराडे ऊर्फ खाडे या परीक्षा परिषदेच्या आयुक्त म्हणून काम करत आहेत. त्यांचा भाऊ दादासाहेब दराडे याने तक्रारदार यांना बहीण शैलजा दराडे या शिक्षण विभागात वरिष्ठ पदावर काम करत असून शिक्षक म्हणून नोकरीस लावण्याचे काम त्या करून देऊ शकतात, असे सांगितले. त्यानुसार तक्रारदार यांच्या दोन वहिनींना शिक्षक पदावर नोकरी लावतो, असे सांगत त्यांच्याकडून प्रत्येकी 12 लाख रुपये आणि 15 लाख रुपये, असे एकूण 27 लाख रुपये घेण्यात आले. परंतु, त्यानंतर त्यांना शिक्षकपदावर नोकरीस न लावता टाळाटाळ करण्यात आली आणि सतत पैशाची मागणी करूनही त्याची परतफेड आरोपींनी केली नाही. अशाचप्रकारे आणखी 44 जणांची फसवणूक करण्यात आल्याचा प्रकार समोर आला आहे. याबाबत पुढील तपास हडपसर पोलीस ठाण्याचे सहाय्यक पोलीस निरीक्षक एस. थोरबोले करत आहेत.
अधिक वाचा : भारत सरकारने कोल्हापुरच्या जवानाला केले ‘पळपुटा’ घोषित
भावाने माझ्या पदाचा गैरवापर केला
दरम्यान, याप्रकरणी परीक्षा परिषदेच्या आयुक्त शैलजा दराडे यांनी दावा केला आहे, की माझा भाऊ दादासाहेब दराडे हा माझ्या पदाचा गैरवापर करून लोकांना शिक्षक पदावर नोकरीस लावून देतो, असे आमिष दाखवून पैसे घेत होता. ही बाब समजल्यावर मी त्याच्याशी वर्षापूर्वीच नाते तोडलेले आहे. त्याच्यासोबत कोणत्याही प्रकारचे आर्थिक व्यवहार कोणी करू नये, अशा प्रकारची जाहीर नोटीसही ऑगस्ट 2020 मध्ये देण्यात आलेली होती.
